SQO-da nekesin buzatyndar sany eki ese azaıǵan
PETROPAVL. QazAqparat – Soltústik Qazaqstan oblysynda qańtar-maýsym aralyǵynda 3294 náreste dúnıege kelse, olardyń ishinde uldardyń úlesi basym, dep habarlaıdy «QazAqparat» HAA tilshisi.
SQO Statıstıka departamentiniń málimetinshe, óńirde 1699 ul bala dúnıege kelse, qyzdardyń úlesi júzge kem. Balalardyń 42,3% Petropavlda týǵan. Al aýdandar arasynda eń joǵary týý koeffıtsıenti Ýálıhanov aýdanynda tirkelip otyr. Mamlıýt aýdany týý kórsetkishinen sońǵy orynda.
Osy aralyqta SQO-da 3158 adam qaıtys boldy.
«Ólimniń 17,4%-yn qan aınalymy júıesiniń aýrýlary, 15,6% - tynys organdarynyń aýrýlary, 9% - as qorytý organdarynyń aýrýlary alady. Al 8,4%-i jazataıym oqıǵalarǵa, ýlaný men jaraqattanýǵa tıesili», - deıdi SQO Statıstıka departamentiniń bas mamany Olga Býbenko.
Bıyl nekege turyp, aıyrylysqandar sany edáýir az. 2020 jyldyń alty aıynda 1124 neke tirkelgen, ol 2019 jyldyń kórsetkishinen 17,5% tómen. Buzylǵan neke sany 2019 jylǵy sáıkes kezeńmen salystyrǵanda 53% kemip, 469-dy qurady.
SQO-ǵa jyl basynan 2398 adam kóship kelse, 4131 adam qonys aýdarǵan. Bul - 2019 jylǵy qańtar-maýsymǵa qaraǵanda 33,1% kem.
«Oblys aýmaǵynan kóship ketkender - 94,4%-y TMD elderine ketip, Sondaı-aq qonys aýdarǵandardyń 87,1%-y TMD elderinen kelgen. Bizdiń oblystan shyqqan emıgranttardyń negizgi bóligin - 98,9% Reseı qabyldaıdy. Oblysqa TMD elderinen kelgenderdiń arasynda da Reseı kósh bastap tur, onyń úlesi 89,2%. Álemniń basqa elderine oblystyń 56 turǵyny qonys aýdardy, oblysqa turaqty turýǵa 44 adam keldi. Shetelge ketetinder negizinen Polsha jáne Germanııany tańdaıdy. Olarǵa basqa elderge ketkenderdiń 94,6%-y qonys aýdardy. Kóship kelgender arasynda Monǵolııa jáne Qytaı turǵyndary basym, olardyń úlesi - 65,9%», - deıdi Olga Býbenko.
Jalpy 2020 jylǵy 1 shilde boıynsha oblystaǵy halyq sany 547,1 myń adamdy qurady, onyń ishinde 253,2 myń adam, ıaǵnı 46,3%-i qalalyqtar, qalǵan 293,9 myń adam aýyldarda turyp jatyr.
