SQO-da Naýryz meıramyn merekeleý bastaldy (FOTO)
ASTANA. QazAqparat - Búgin Soltústik Qazaqstan oblysynda Naýryz meıramyna arnalǵan merekelik sharalar bastaldy. Bul týraly oblys ákimdiginiń baspasóz qyzmeti habarlady.
«Petropavl qalasynyń ortalyq alańynda «Armandar aǵashy» kompozıtsııasy, etnoaýyl men qolóner shyǵarmashylyǵy kórmesi uıymdastyryldy. Merekelik sharaǵa SQO ákimi Erik Sultanov bardy», delingen habarlamada.
Qazaqstan halqy Assambleıasy ǵımaraty aldynda etnomádenı birlestikterdiń ókilderi mereke qonaqtaryna ulttyq taǵamdar usynylǵan Dostyq dastarhanyn jaıdy.
Jaqyn mańda ulttyq sheberler ózderiniń buıymdarynyń kórmesin usyndy. Óńir basshysy qolóner úlgilerimen tanysty.
Etnoaýylda Erik Sultanov teatrlanǵan «Tusaý kesý» dástúrine qatysty.
Merekelik baǵdarlama keshke deıin sozylady. Kúni boıy baýyrsaq jeý men eń úzdik naýryz kójeni daıyndaý baıqaýlary, ulttyq oıyndar men sporttyq jarystar ótedi. Múmkindigi shekteýli balalarǵa arnaıy baǵdarlamalar uıymdastyrylady.
Aldaǵy eki kúndegi merekelik baǵdarlamalar da qyzyqty bolmaq. «Baýyrsaq-fest» aktsııasy boıynsha meımandardyń aldynda baýyrsaq pisirilip, qonaqtarǵa taratylady. Budan basqa ulttyq kıimder defılesi, oblystyq kıiz úıler baıqaýy, óńirlik aqyndar aıtysy, sondaı-aq, oıyn-saýyq jáne otbasylyq baǵdarlamalar usynylady.
