SQO-da naýryzda aýa raıy qandaı bolmaq

PETROPAVL. KAZINFORM — Soltústik Qazaqstan oblysynda naýryzda ortasha aýa temperatýrasy -5,…-7°S, ıaǵnı normadan 1°S joǵary bolmaq. 

«Qazgıdromet» kásiporny oblystyq fılıalynyń málimetinshe, aıdyń birinshi onkúndigi sýyq bolyp, qar jaýady.

Tek ekinshi onkúndikten bastap óńirge kóktem kelip, aýa temperatýrasy túnde +3,…+2 gradýsqa deıin, kúndiz +2,…+7 deıin birtindep kóteriledi dep boljanǵan.

Úshinshi onkúndikte aýa temperatýrasy qubylmaly bolady, túnde +3,…+2 pen  -3,…-8 aralyǵynda, kúndiz +5,…+10 gradýstan 0,…+5 gradýsqa deıin aýytqýy múmkin.

Temperatýranyń joǵarylaýy jáne jyly atmosferalyq fronttardyń, sondaı-aq jańbyr túrinde tsıklonmen ótýi erigen sýdyń paıda bolýyn kúsheıtedi. Bir aıda jaýǵan jaýyn-shashyn mólsheri oblystyń kóp bóliginde normadan kóp bolýy yqtımal. Tuman túsip, ekpini 15-20 m/s jetetin jel bir aı ishinde jıi bolmaq.

Osyǵan baılanysty, mamandardyń aıtýynsha, bıyl sý tasqyny kezeńinde erigen qar sýynan qaýip bar. Sondaı-aq ózenderde muzdardyń jarylyp, qozǵalýyna baılanysty sý deńgeıi keı jerlerde kóterilýi múmkin. Muz naýryz aıynyń ortasynan jaryla bastaıdy.

Sý tasqyny kezeńine negizgi boljamdy «Qazgıdromet» fılıaly 2 naýryzǵa deıin usynbaq. Naýryz aıynan bastap gıdrologııalyq boljam apta saıyn usynylsa, gıdrologııalyq bıýlleten aı basynan shyǵarylady.

Gıdrometeojaǵdaı ózgerip, sý tasqyny qaýpi týyndaǵan sátte daýyldy eskertýleri jiberiletin bolady.

Buǵan deıin Soltústik Qazaqstan oblysyndaǵy iri sý qoımalary sý tasqynyna daıyn turǵanyn jazǵan edik.