SQO-da naýqaspen baılanysta bolǵan eki adam koronavırýs juqtyrdy
PETROPAVL. QazAqparat – Petropavlda naýqaspen jaqyn qarym-qatynasta bolǵan eki adamnan qaýipti indet anyqtaldy, dep habarlaıdy QazAqparat tilshisi.
Shuǵyl shtabtyń málimetinshe, COVID-19 indetin juqtyrǵan ekeý Petropavl qalasynda turady. Er adam - 1955, áıel – 1988 jyly týǵan. Olar astanada emdelip, sol jaqta koronavırýs juqtyryp alǵan 63 jastaǵy áıelmen jaqyn qarym-qatynasta bolǵan.
COVID-19-ǵa tekserý nátıjesinde olardyń saraptamasy oń nátıje berdi. Qaýipti vırýsty juqtyrǵandar Petropavldaǵy birinshi qalalyq aýrýhananyń juqpaly aýrýlar bólimine jatqyzyldy. Naýqastarda aýrýdyń klınıkalyq belgileri joq. Olarmen baılanysta bolǵan 7 adam anyqtaldy. Epıdemıologııalyq tergeý jumystary júrgizilip jatyr.
Jalpy, 2 maýsymdaǵy jaǵdaı boıynsha SQO aýmaǵynda COVID-19 vırýsyn juqtyrǵan 61 adam tirkelgen.
