SQO-da mýzeıge kirý nelikten qaıtadan aqyly boldy

PETROPAVL. KAZINFORM – Soltústik Qazaqstan oblysynda alty jyl boıy bıletsiz tegin jumys istegen mýzeılerge kirý endi aqyly.

SQO mádenıet, tilderdi damytý jáne arhıv isi basqarmasynyń málimetinshe, oblystyq mýzeılerge barlyq sanattaǵy azamattar 2018 jyldyń sáýirinen bastap 2025 jyldyń 1 aqpanyna deıin, ıaǵnı shamamen 6 jyl boıy tegin kirdi. 

Bul tájirıbe respýblıka boıynsha tek SQO-da ǵana qoldanyldy. Eldiń basqa óńirlerinde halyq mýzeılerge tek aktsııalar kezinde nemese «Mýzeıdegi tún» sııaqty belgili bir is-sharalarda ǵana aqysyz kiredi. 

Basqarma qyzmetkerleriniń aıtýynsha, mýzeıge kirýdi aqyly etý týraly sheshim jyldyń sońyna qaraı qabyldanǵanymen, uıymdastyrý sharalary ýaqyt alǵan. 

- 2018 jyldan 2024 jylǵa deıingi kezeńde mýzeılerdiń materıaldyq-tehnıkalyq bazasy tek ishinara 20% ǵana jańartyldy, ıaǵnı qalǵan múlik moraldyq turǵyda tozǵan. Oblystyq bıýdjetten bólingen qarajat mýzeılerdi kútip ustaýǵa jáne olardyń jumys isteýi úshin kommýnaldyq jáne basqa da qyzmetterdiń tólemaqysyna ǵana jetedi.

Oblystyq mýzeıler «memlekettik qazynalyq kásiporyn» quqyqtyq nysanynda qurylǵan jáne memleketke múlikti jedel basqarý quqyǵymen berilgen kommertsııalyq uıym bolyp esepteledi.

«Memlekettik múlik týraly» QR zańyna sáıkes memlekettik kásiporynnyń qyzmeti damý josparyna sáıkes óz tabysy jáne bıýdjet qarajaty esebinen qarjylandyrylady, - deıdi basqarma ókilderi.

Qosymsha qarajat mýzeılerdiń jaǵdaıyn jaqsartyp, damytýǵa jumsalmaqshy. Aqyly qyzmet kórsetý esebinen túsken kiris mýzeı bıýdjetinde qalady jáne uıymnyń qajettiligine jumsalady. Sonyń ishinde qarajat ekspozıtsııany jańartýǵa, jádigerlerdi qalpyna keltirýge, materıaldyq-tehnıkalyq bazany nyǵaıtý jáne t.b. qoldanylmaq. 

Qazir SQO-da mýzeıge kirý eresekter úshin 300 teńge, stýdentterge – 200, al balalarǵa – 100 teńge. Aýdandarda baǵasy arzanyraq, eresekter 200 teńge tólese, stýdentterge – 100, balalarǵa 50 teńge turady. Bes jasqa deıingi balalar men múgedektigi bar jandar jáne ár aıdyń 10 jáne 20-sy kúni zeınetkerler úshin mýzeıge kirý tegin bolyp qala bermek. 

Esterińizge salaıyq, buǵan deıin shalǵaıda jatqan aýyldardaǵy mýzeılerdiń búgingi jaı-kúıi týraly jazǵan edik.