SQO-da mýzeı kollektsııasy mamont súıegimen tolyqty
PETROPAVL. QazAqparat - Petropavl turǵyny Aleksandr Remshov balyq aýlaý kezinde taýyp alǵan mamonttyń súıekterin oblystyq tarıhı-ólketaný mýzeıine ótkizdi, dep habarlaıdy QazAqparat tilshisi.
Tabıǵat bóliminiń ǵylymı qyzmetkeri Maksım Sorochınskııdiń aıtýynsha, petropavldyqtyń tapqan oljasy - iri mamonttyń jambas súıegi men moıyn omyrtqasy. Qazir ony zerttep jatyr.
«Tabylǵan mamont súıekteri bizdiń óńirge tıesili. Sońǵy súıekter osydan eki jyl buryn tabylǵan edi. Ony Taıynsha aýdany Zelenyı Gaı kentine jaqyn jerden, Ertis ózeniniń jaǵalaýynan tapqan. Ádette, súıekterdi jaǵalaýdyń opyrylǵan jerlerinen taýyp jatady», - dep atap ótti M. Sorochınskıı.
Paleontologııa mýzeıiniń zalyna birneshe súıek qoıylǵan. Olardyń eń baǵalysy - 1923 jyly Petropavl tóńireginen, Ertis jaǵasynan tabylǵan mamonttyń azýy. Onyń azýynyń uzyndyǵy 4,5 metr bolsa, salmaǵy 100 kelige deıin jetken.
Mýzeı qyzmetkerleriniń aıtýynsha, Soltústik Qazaqstan oblysynyń aýmaǵynda sońǵy mamonttar 11 myń jyl buryn tirshilik etken. Bul óńirdi túkti múıiztumsyqtar da mekendegen. Bul janýardyń súıegi de mýzeıde bar.
