SQO-da múgedektigi bar tulǵalarǵa zańsyz salyq salynǵan
PETROPAVL. KAZINFORM - Soltústik Qazaqstan oblysynda múgedektigi bar jumysshylardan jeke tabys salyǵy ustalyp kelgen.
SQO prokýratýrasynyń málimetinshe, salyq zańnamasyn óreskel buzý faktilerin qadaǵalaý organy taldaý barysynda anyqtady.
Máselen, 2023-2024 jyldary Aqjar, Esil, Ǵ.Músirepov, Mamlıýt, Shal aqyn, Taıynsha aýdandarynyń jumys berýshileri Salyq kodeksiniń talaptaryna qaıshy, múgedektigi bar 366 jumysshydan jalpy somasy 16,9 mln teńge jeke tabys salyǵyn ustap qalǵan. Bul azamattar zańǵa sáıkes salyqtyń bul túrin tóleýden bosatylǵan.
Esil aýdanynda bilim bóliminiń laýazymdy tulǵalary jalpy somasy 1,7 mln teńgege múmkindigi shekteýli balalardyń 24 zańdy ókilinen jeke tabys salyǵyn negizsiz ustaǵan.
Prokýrorlyq qadaǵalaý aktilerimen memlekettik kiris organdary 6,2 mln teńgeni qaıtardy. Qazir kinálilerdi zań boıynsha jaýapkershilikke tartý sharalary qabyldanyp jatyr. Nátıjesinde qalǵan soma da qaıtarylatyn bolady.
Buǵan deıin prokýratýra Jambyl oblysynda 930 bala arnaıy medıtsınalyq tekseristen ótpegenin anyqtaǵan edi.