SQO-da múgedek sportshylar paralımpııadalyq lıtsenzııany jeńip alý úshin jattyǵyp jatyr
PETROPAVL. QazAqparat – Petropavldaǵy múmkindigi shekteýli jandarǵa arnalǵan «Úmit» sport klýbynyń músheleri Tokıo paralımpııadasynyń lıtsenzııasyn jeńip alý úshin qyzý daıyndyqty bastap ketti, dep habarlaıdy QazAqparat tilshisi.
«Úmit» sport klýbynyń músheleri aqpan jáne naýryz aılarynda Birikken Arab Ámirlikteri men Taıland elinde ótetin halyqaralyq jarystarǵa qatysady. Maqsat – Tokıo paralımpıadasynyń lıtsenzııalaryna qol jetkizý.
«Úmit» sport klýbynyń múshesi Sergeı Harlamov Londondaǵy paralımpıada oıyndaryna qatysty. Ol jeńil atletıkadan óńirdegi jalǵyz halyqaralyq sport sheberi. Sporttyń bul túrine kelgenine 11 jyl bolǵan Sergeıdiń kóptegen jetistikteri bar. Jattyqtyrýshylary bul joly da oǵan zor úmit artyp otyr.
«Bizdiń sportshylarymyzdy 12 bilikti bapker jattyqtyrady. Klýb músheleriniń barlyǵy birdeı halyqaralyq sport sheberi nemese kásibı sportshy bolýy múmkin emes. Kelýshilerdiń deńgeıi ártúrli. Bireýleri densaýlyqtaryn túzeý úshin jattyǵady. Endi biri bolashaǵyn sportpen baılanystyryp, júıeli túrde aınalysady. Olarǵa biz basymdyq beremiz», - deıdi klýb dırektory Vıacheslav Latyshev.
Múmkindigi shekteýli jandarǵa arnalǵan «Úmit» sport klýby 2013 jyly quryldy. «Qarasaı» stadıonynda ornalasqan. Klýb ashylǵan kezde bar bolǵany 30 shaqty sportshy bolsa, búgingi kúni klýbta 200-ge jýyq múgedek jeńil atletıka, shańǵy, fýtbol, júzý, ústel tennısi sekildi sporttyń 11 túrimen aınalysady. Olar kóptegen baıraqty básekelerge qatysyp, júldeli oryndardan kórindi. Qazir klýbtyń 13 múshesi sportta jetken joǵary jetistikteri úshin oblys ákiminiń stıpendııasyn alady.
