SQO-da múgedek balalardyń quqyǵyn buzǵan 24 adam jaýapkershilikke tartyldy
SQO prokýratýrasy baspasóz qyzmetiniń málimetinshe, tekseris barysynda 90-nan astam zań buzýshylyq anyqtalyp, prokýrorlyq qadaǵalaýdyń 57 aktisi engizildi. Múgedek balalardyń quqyǵyn buzǵan 24 adam ákimshilik jaýapkershilikke tartyldy. Nátıjesinde 100-den astam múgedek balanyń quqyǵy qorǵaldy. Inklıýzıvti bilim berýdi damytý aımaqtyq baǵdarlamasy ázirlenip, 3 myńnan astam muǵalimge jalpy somasy 18 mln teńge shamasynda ústemeaqy tólendi.
«Múgedek balalardy ońaltýǵa arnalǵan baǵdarlamalardyń sapasyz ázirlenip jasalǵandyǵy, mektepterdiń ınklıýzıvti bilim berý talaptaryna ishinara sáıkessizdigi, qondyrǵylarmen qajetti deńgeıde jaraqtandyrylmaýy, oqytýshylardyń eńbekaqylaryna tıisti qosymshalardyń engizilmeýi, olardyń biliktilikti arttyrý kýrstarynan ótpeýi sekildi birqatar olqylyqtar anyqtaldy», - delingen habarlamada.
«Múgedekterdi áleýmettik qorǵaý» Zańynyń talaptaryna saı 181 múmkindigi shekteýli bala jeke ońaltý baǵdarlamasyna sáıkes tehnıkalyq qural-jabdyqtarmen qamtamasyz etilmegen. Múgedek balalary úıde oqıtyn eki ata-anaǵa ortaq somasy 32 myń teńge bolatyn mindetti áleýmettik járdemaqy tólenbegen. Qolǵa alynǵan is-sharalardan keıin járdemaqy berildi.
Prokýrorlardyń tekserisinen keıin oblystyń bilim basqarmasy ınklıýzıvti bilim berýdi damytý aımaqtyq baǵdarlamasyn jasady. Osy baǵdarlamany júzege asyrý barysynda jekemenshik qaıyrymdylyq qorlarynyń kómegimen birneshe arnaıy nysandar ashyldy. «Aýtızm. Álem barlyǵy úshin bir» psıhologııalyq-pedagogıkalyq túzetý kabıneti, múmkindigi shekteýli balalarǵa arnalǵan 2 resýrstyq kabınet jáne aýtıst balalarǵa arnalǵan eki kabınet paıdalanýǵa berildi.
Sondaı-aq, bıyl ınklıýzıvti bilim beretin oblystyń 474 ustazy biliktilikti arttyrý kýrstarynan ótti.