SQO-da muǵalimderge birqatar jeńildik jasalyp jatyr
Jańa oqý jyly qarsańynda SQO kásipodaq ortalyǵy bilim berý salasyna qatysty atqarylǵan jumysqa esep berdi. Óńir boıynsha bilim salasynda ǵana 555 bastaýysh kásipodaq uıymy bar, oǵan 26 myńnan astam adam múshe.
«Bilim berý salasynda kásipodaq músheleri kóp, osyǵan baılanysty 2021-2023 jyldarǵa arnalǵan salalyq kelisimge biz kóptegen ózgerister engizdik. Onyń ishinde pandemııa jaǵdaıyn da eskerdik. Jumys belgili sebeptermen toqtap qalǵan jaǵdaıda, ol jumys berýshiniń de jumysshynyń da kinási emes, biz ortasha mólsherdegi eńbekaqyny saqtap qalatyn kelisimge keldik. Bul kelisimge engizilgen taǵy bir shart – osy salada eńbek etetin medıtsına qyzmetkerleriniń, býhgalterlerdiń, úılestirý bólimderi jumysshylarynyń, kitaphanashylardyń eńbek demalysyn úsh kúnge uzartý.
Buryn qyzmetkerler biliktiligin arttyrýǵa óz qarajatyn jumsaıtyn. Bul máseleni eki jyl qatarynan kóterip, endi ol sheshimin tapty. Aýyldyq jerlerde kommýnaldyq máselelerdi sheshý qarastyrylyp jatyr. Munda da oń ózgerister bar», - deıdi SQO kásipodaq ortalyǵynyń dırektory Erik Nuraqaev.
Sondaı-aq jyldaǵy medıtsınalyq tekseristen ótý úshin bilim berý salasynyń qyzmetkerleri endi qaltalarynan qarajat shyǵarmaıdy, olar úshin jumys berýshi tóleıdi. Bıýdjetten 100 % qarajat bólinedi.
«2019 jyly tek 5 aýdanda medıtsınalyq baıqaý aqysy jumys berýshiniń esebinen tólendi. Osyǵan baılanysty muǵalimderden medıtsınalyq baıqaýdy tegin qylýǵa qatysty ótinishter tústi. Kásipodaqtar eki jyl boıy osy suraq boıynsha monıtorıng júrgizdi. Bilim jáne densaýlyq saqtaý basqarmalaryna suranys túsirdi. «Bıýdjettik uıymdarǵa bekitilgen qyzmetkerler tobyn jumys berýshiniń esebinen jyl saıyn aqysyz medıtsınalyq baıqaýdan jáne gıgıenalyq oqýdan ótkizý» týraly máseleni talqylaýǵa bastama jasady. Nátıjesinde 21 maýsym kúni áleýmettik seriktestik boıynsha oblystyq úshjaqty komıssııa bıýdjet salasyndaǵy barlyq basqarmalarǵa - densaýlyq saqtaý, bilim berý, mádenıet, tilderdi damytý jáne muraǵat isteri, dene tárbıesi jáne sport basqarmalaryna mindetti medıtsınalyq baıqaý aqysyn jumys berýshiniń esebinen tóleýdi qamtamasyz etý týraly usynys jasady», - deıdi Erik Nuraqaev.
SQO-da kásipodaqtyń demalys nysandary joq. Bul máseleni sheshý úshin tıisti sharalar qolǵa alynyp jatyr. Óńir muǵalimderi men olardyń otbasy músheleri Qazaqstannyń sanatorlyq-kýrorttyq demalys oryndarynda saýyǵa alady. Jyl basynan kásipodaqqa múshe 830 pedagog demalýǵa múmkindik aldy. Jyl sońyna deıin shamamen 25,5 mln teńgege taǵy 1300 ustaz demalyp qaıtpaq.
