SQO-da muǵalimder olımpıadasy bastaldy
SQO bilim basqarmasynyń málimetinshe, pán muǵalimderiniń oblystyq olımpıadasy 25-31 naýryz aralyǵynda ótedi. Buǵan deıin aýdandyq kezeńi ótip oǵan 2 myńnan astam ustaz qatysty. Oblystyq saıysta úzdik tanylǵan 100-den astam ustaz baq synap jatyr. Bul shara tek Soltústik Qazaqstanda ǵana 2019 jyldan beri uıymdastyrylyp keledi.
«Bul olımpıada pán muǵalimderi qaýymdastyǵynyń qoldaýymen uıymdastyrylǵan. Ótken jyly tek hımııa jáne bıologııa páni muǵalimderiniń arasynda ótkizildi. Al bıyl aýqymy keńeıip, 8 pándi qamtydyq. Olımpıada oblystyń úzdik te, talantty muǵalimderin qoldaý maqsatynda ótkiziledi. Jeńimpazdar marapattalyp, sertıfıkattar alady», - deıdi SQO bilim salasyndaǵy ádistemelik ortalyq jáne aqparattyq tehnologııalar ortalyǵy dırektorynyń orynbasary Aıgúl Jylqojına.
Bıyl mektep muǵalimderi bıologııa, fızıka, matematıka, tarıh, hımııa, geografııa, qazaq tili pánderi boıynsha jáne bastaýysh synyp ustazdary olımpıadaǵa qatysyp jatyr. Solardyń biri – 20 jyldyq eńbek ótili bar Aqerke Shoqaeva. Ol Qyzyljar aýdany Ozernoe orta mektebinde bıologııa páninen sabaq beredi.
«Men birinshi ret qatysyp jatyrmyn olımpıadaǵa. Ótken aptada aýdandyq kezeńge qatysyp, test tapsyrdym, portfolıo qorǵadym. Mundaı saıystar muǵalimderge kerek dep oılaımyn. Biliktiligimizdi arttyryp, óz dárejemizdiń qandaı deńgeıde ekenin bilemiz», - deıdi Aqerke Shoqaeva.
