SQO-da motokýltıvatormen jol erejesin buzǵandar jazalanyp jatyr
PETROPAVL. QazAqparat – Soltústik Qazaqstan oblysynda tek Mamlıýt aýdanynda ǵana sońǵy eki aptada motokýltıvatormen jolda júrý erejesin buzǵan 12 adam jazalandy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, motokýltıvatorlardy kólik quraly retinde paıdalaný durys emes. Bul tehnıka túri jer ýchaskesin jyrtýǵa arnalǵan.
Degenmen, aýyl-aýdan turǵyndary tirkeme tirkep alyp, ony qozǵalys quraly retinde paıdalanady, tipti adamdardy, júkterin tasymaldaıdy.
Onyń ústine, tájirıbe kórsetkendeı, apattyq jaǵdaı týdyryp, jol erejesin óreskel buzady.
«Aýyldyqtar motokýltıvatorlarymen eldi mekennen alystap, tipti tas joldarǵa da shyǵyp ketedi, masań kúıde júretinderi de bar, keıde kámeletke tolmaǵandar da tizgindeıdi. Mamlıýt aýdanynda kúzdiń basynda patrýldik polıtsııa tobynyń qyzmetkerleri kýltıvatorlardyń ıelerine qatysty 12 hattama toltyrdy. Oǵan jolaýshylar men júk tasymaldaý erejelerin, manevrleý erejelerin buzý negiz boldy. Al bir kólik ıesi ony mas kúıinde tizgindegeni úshin jaýapqa tartyldy», - deıdi Mamlıýt aýdanynyń PB bastyǵynyń mindetin atqarýshy Isa Mustafın.
Mamannyń aıtýynsha, mundaı tehnıka ıeleri jolda júrý erejelerin bilmeıdi.
Motokýltıvatormen júrip kele jatyp, buryla salýy múmkin. Saldarynan jol-kólik oqıǵasy oryn alady.
«Jol qozǵalysy erejelerin saqtamaýdyń saldary aýyr. Jol apatyna ákelýi múmkin. Osyndaı qaıǵyly jaǵdaılardyń aldyn alý úshin polıtsııa qyzmetkerleri motokýltıvator ıeleri tarapynan jasalatyn ereje buzýshylyqtardy boldyrmaýǵa baǵdarlanǵan. Qozǵalys quralynyń túrine qaramastan jolda júrý erejelerin qatań saqtaý qajet ekendigin esterińizge salamyz», - deıdi Isa Mustafın.
