SQO-da monıtorıngtik toptar myńnan astam nysandy tekserip, 20 adamdy jazalady

PETROPAVL. QazAqparat – Soltústik Qazaqstan oblysynda tek qyrkúıek aıynda monıtorıngtik toptar 1035 nysandy tekserip, 20 adamǵa 1,2 mln teńge aıyppul saldy, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti basshysy Áset Jumataevtyń aıtýynsha, shekteý talaptaryn buzýshylardy anyqtaý boıynsha jumystar jalǵasyp jatyr. Oblysta 23 monıtorıngtik top bar. Olar qyrkúıekte 200-ge jýyq reıd ótkizip, 1035 nysandy tekserdi. Nátıjesinde 20 adam jalpy somasy 1,2 mln teńge aıyppul tóledi.

Úı karantıni rejımin buzǵan adamdar da anyqtalyp jatyr. «Qyzyl», «sary» mártebesi bola tura Ashyq engizgen nysandarǵa kirýge tyrysqan 54 adam jaýapqa tartyldy.

«Búginnen bastap shekteý sharalaryn jeńildetip jatyrmyz. Alaıda, saqtyqty umytpaǵan jón. Vırýs joıylǵan joq, ol qasymyzda jáne óte qaýipti. Onymen tek vaktsınatsııa arqyly, sonymen qatar maska kııý, áleýmettik qashyqtyqty saqtaý, áleýmettik baılanystardy tómendetý sııaqty erejeler arqyly ǵana kúrese alamyz. Halyqty vaktsınatsııalaý qarqynynyń tómendeýi epıdemıologııalyq jaǵdaıǵa teris áser etedi, ujymdyq ımmýnıtetti qalyptastyrýǵa múmkindik bermeıdi, saldarynan vırýs vaktsınatsııalanbaǵan halyq arasynda tez taralady. Eger epıdemıologııalyq jaǵdaı nasharlasa, biz qatań shekteýlerge júginýge mindettimiz», - deıdi Áset Jumataev.

Mamannyń aıtýynsha, óńirde vaktsına qoıǵyzý deńgeıi tómendep ketken. Táýligine orta eseppen 400-500 adam ǵana ekpe alady.

Jalpy SQO-da 240 374 adam birinshi komponentpen egildi, 216 922 ekinshi komponentti aldy.