SQO-da monıtorıng toptary bir aptada 28 toıdy tarqatty

PETROPAVL. QazAqparat – Soltústik Qazaqstan oblysynda monıtorıngileý toptary dámhana, meıramhana, toı ótkizýge jalǵa beriletin kottedjderdi baqylaýǵa alǵan, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, vedomstvoaralyq monıtorıng toptary toıhanalarda, dámhanalarda, jaldamaly kottedjder men basqa da saýda nysandarynda sanıtarııalyq normalardy buzý derekterin anyqtaýmen aınalysady.

SQO PD bastyǵynyń birinshi orynbasary Qanat Aıtbaevtyń sózinshe, oblysta quramyna túrli memlekettik organdardyń 160-tan astam ókili kiretin 24 mobıldi monıtorıng toby jumys isteıdi. Onyń quramynda ákimdik, polıtsııa ókilderi jáne qoǵamdyq kómekshiler men volonterler bar. Tekserister ár aptanyń sońǵy kúnderim - juma, senbi jáne jeksenbi kúnderi júrgiziledi.

Ótken juma kúni monıtorıng toby Petropavldaǵy «Bereke» shaǵynaýdanynda týǵan kún keshin ótkizip jatqan kottedjdi anyqtady. Atalǵan fakti boıynsha is-sharany uıymdastyrýshyǵa qatysty ákimshilik materıal jınalyp, is sanıtarııalyq-epıdemıologııalyq baqylaý basqarmasyna jiberildi.

SQO-da jyl basynan shekteý sharalaryn buzýdyń 1059 deregi anyqtaldy. Onyń 28-i sońǵy jeti kúnde bolǵan. Anyqtalǵan 1059 derek boıynsha 941 materıal SQO sanıtarııalyq-epıdemıologııalyq baqylaý departamentine jiberildi. 118 materıal boıynsha polıtsııa qyzmetkerleri málimetter jınaqtap jatyr. Sanıtar dárigerler 627 ákimshilik hattama toltyrdy. Onyń 578-i jeke tulǵaǵa, 30-y zańdy tulǵaǵa jáne 1 laýazymdy tulǵaǵa qatysty, 241 materıal toqtatyldy. Taǵy 27 materıal mamandardyń qaraýynda jatyr.