SQO-da mıokard ınfarktisinen qaıtys bolǵandar sany kúrt artty
PETROPAVL. QazAqparat – Soltústik Qazaqstan oblysynda byltyr mıokard ınfarktisinen 9 adam qaıtys bolsa, bıyl úsh aıda ǵana 20 adam kóz jumǵan, dep habarlaıdy QazAqparat tilshisi.
SQO-nyń kardıologııalyq ortalyq qarqyndy terapııa blogynyń meńgerýshisi Mıhaıl Telıýktyń aıtýynsha, mıokard ınfarkti nemese júrek ustamasy qan tamyrynyń júrek bulshyq etin qajetti ottegimen qamtamasyz ete almaýynan damıtyn mıokardtyń ıshemııalyq nekrozy, ıaǵnı óli ettený oshaǵynyń paıda bolýy.
«Óńirde byltyr 279 adam jiti mıokard ınfarktisi boıynsha dıspanserlik esepke alyndy. 2020 jyly 2449 adam aýyrsa, ótken jyly osy dertpen 2440 naýqas dárigerge qaraldy. Búginde mıokard ınfarktisi keń taraǵan jáne ol naýqastyń kenetten ólip ketýiniń negizgi sebebine aınalǵan. Infarkt problemasy áli tolyq sheshilgen joq jáne bul aýrýdan ólip ketýshilerdiń sany artyp keledi», - deıdi Mıhaıl Telıýk.
SQO-da júrek ustamasynan 2020 jyly 12 adam, byltyr 9 adam qaıtys boldy. Al bıylǵy úsh aıdyń ishinde kóz jumǵandar sany 20-ǵa jetken.
«Júrek ustamasy oıda-joqta ustamaıdy. Bul dertke júrektiń ıshemııalyq aýrýy, koronarlyq arterııalardyń aterosklerozy nemese basqa patologııa sebep bolady. Máselen, tromb – uıyǵan qan aterosklerozdan tarylǵan koronarlyq arterııany bitep tastaıdy. Saldarynan mıokardqa ottegi barmaıdy, uzaq ýaqyt ottegimen qanyqpaǵandyqtan bulshyq et jasýshylary óle bastap, júrekti zaqymdaıdy. Sondaı-aq onyń týyndaýyna shamadan tys tamaqtaný, qımyl-qozǵalystyń azdyǵy, gıpertonıkalyq aýrýlar, jaǵymsyz ádetter, sonyń ishinde shylym shegý áser etedi», - deıdi kardıolog dáriger.
Mamannyń aıtýynsha, júrek ustamasy ustaǵan kezde bir saǵatqa jýyq keýdeniń artqy jaǵy qatty kúıdirip, qysyp, batyp, tyrnap aýyrady. Kóbinese aýyrsyný sol jaq ıyq, jaýyryn asty men qolǵa beriledi. Naýqastan sýyq jabysqaq ter shyǵyp, qorqynysh sezimi, álsizdik, entigý paıda bolady eken.
«Belgileri paıda bolǵanda birden jedel járdem qyzmetin shaqyrý qajet. Aýrýhanaǵa jatqyzǵanǵa deıin til astyna nıtroglıtserınnniń bir tabletkasyn salyp, 0,25-0,35 g aspırın ishkizý kerek. Mıokard ınfarktisiniń aldyn alýǵa bolady. Ol úshin eń aldymen temekini tastaǵan jón.
Maıly tamaqtardan bas tartý, tuzdy paıdalaný mólsherin azaıtý, quramynda kalııi mol tamaqtardy kóp paıdalaný, kókenis pen jemis-jıdekterge basymdyq berý, dene belsendiligin arttyrý, semizdikten saqtaný, qandaǵy holesterın quramyn únemi tekserip, baqylap otyrý qajet. Aýrýdy emdegennen, onyń aldyn alǵan durys», - deıdi Mıhaıl Telıýk.
