SQO-da myńǵa jýyq ustazdyń orny bos tur

PETROPAVL. KAZINFORM — Soltústik Qazaqstan oblysynda aýyldyq jerlerge ǵana 675 muǵalim kerek.

Oblystyq ákimdikte jańa oqý jylyna ázirlik pysyqtaldy. 

SQO bilim salasynda sapany qamtamasyz etý departamentiniń dırektory Gúlnar Talasbaevanyń aıtýynsha, bıyl óńirde 11 mektep renovatsııadan ótse, taǵy ony kúrdeli jóndelip jáne 42 mektep jańǵyrtylyp jatyr. 

— Renovatsııa júrip jatqan 11 mekteptiń bárinde jumys bekitilgen kestege saı júrip jatyr. Alaıda, qarjylandyrýdyń jetkiliksizdigine baılanysty keıbir mektepterde renovatsııa keshendi emes, tek jekelegen baǵyttar boıynsha júzege asady. Oblystyń barlyq mektebinde ishki sanıtarlyq bólmeler bolǵanymen, 102 dala dárethanasy áli de mektep aýmaǵynda tur. Olar jańa oqý jyly bastalǵanǵa deıin joıylýy tıis, — dedi Gúlnar Talasbaeva.

Mektepterde muǵalimder ǵana emes, dırektorlar da jetispeıdi, 444 mekteptiń 44-inde basshy orny bos tur. Bıyl pedagogıkalyq mamandyqtar boıynsha 925 túlek oqý ornyn bitirgen, olardyń jumysqa ornalasýyn da departament baqylaýǵa alǵan.

— Bıyl 38 bilim berý mekemesi memlekettik attestatsııadan ótti. Onyń 11-i ǵana jaqsy nátıje kórsetti. Óte almaǵan 27 mekteptiń toǵyzy barlyq olqylyqty joıdy. Qalǵan 17 mekteptiń attestatsııany qaıta ótý kezegi jetken joq. Jalpy salystyrmaly túrde aıtar bolsaq, byltyrǵymen salystyrǵanda kemshilikter sany azaıǵan, — deıdi departament basshysy.

Buǵan deıin SQO-da jańa oqý jylynda eki jańa mektep paıdalanýǵa beriletinin jazǵan edik.