SQO-da meteorologter qys aldynda topyraqtaǵy ylǵal qoryn anyqtady
PETROPAVL. KAZINFORM — Soltústik Qazaqstan oblysynyń keı aýdandarynda topyraqtaǵy ylǵal qory normadan birneshe ese asqan.
«Qazgıdromet» kásiporny oblystyq fılıalynyń mamandary topyraqtaǵy ylǵal qoryn anyqtaý úshin 18,7 myń gektar alqapta marshrýttyq zertteý júrgizdi. Onyń ishinde daqyly orylǵan egistikter, jyrtylǵan alqaptar jáne tyńaıǵan jerler tekserildi.
— Óńirdiń basym bóliginde topyraqtaǵy ylǵal qory qanaǵattanarlyq jáne ońtaıly deńgeıde dep aıtýǵa bolady. Ylǵal qorynyń qalyptasýyna kúzde jaýǵan jaýyn-shashyn jáne býlanýdyń tómendeýi áser etken. Qarasha aıyndaǵy jyly aýa raıy men jańbyr jáne sýly qar túrindegi jaýyn-shashyn topyraqty áli de ylǵalmen qanyqtyryp jatyr. Bul derekter aýyl sharýashylyǵynda kóktemgi egis naýqanyna daıyndyq pen ylǵal qoryn boljaý kezinde, sondaı-aq gıdrologııalyq boljam jasaý barysynda negiz retinde qoldanylady, — deıdi «Qazgıdromet» kásiporny oblystyq fılıalynyń dırektory Qymbat Merǵalımova.
Mamandardyń deregi boıynsha, máselen, M.Jumabaev aýdanynda norma 66 mm bolsa, qazirgi kórsetkish 172 mm kórsetken.
Sondaı-aq, Jambyl, Aqqaıyń jáne Ýálıhanov aýdandarynda da topyraqtyń bir metrlik qabatyndaǵy ylǵal qory normaǵa qaraǵanda eki eseden de kóp. Al Tımırıazev, Ǵ. Músirepov, Taıynsha jáne Mamlıýt aýdandarynda bul kórsetkish normaǵa qaraǵanda 24–74% joǵary. Kóktemde sý basý qaýpi joǵary Qyzyljar, Shal aqyn aýdandarynda ylǵal qory normadan asyp ketken.
Tek Esil jáne Aıyrtaý aýdandarynda ylǵal qory normadan 13–17% tómen bolyp otyr.
Buǵan deıin SQO-da kóktemgi sý tasqynyna qarsy daıyndyq júrip jatqanyn jazǵan edik.