SQO-da «Mereıli otbasy» baıqaýynyń jeńimpazy anyqtaldy
Baıqaýǵa óńirdiń 14 aýdanynan 17 otbasy qatysty. Saltanatty sharaǵa qatysqan oblys ákiminiń orynbasary Rýslan Álishevtiń aıtýynsha, bıylǵy konkýrsanttardyń 40% - kópbalaly otbasylar.
«Baıqaý 2013 jyldan beri ótip keledi. Búginde halyq arasynda tanymal jáne súıikti baıqaýlardyń birine aınalǵan. Ony búgingi is-sharadan-aq baıqaýǵa bolady. Bizdiń qoǵamda otbasy - rýhanı qundylyqtardyń negizi. Urpaqtar sabaqtastyǵy arqyly halqymyzdyń úlkenderdi syılaý, qonaqjaılyq, eńbekqorlyq sekildi kóptegen jaqsy qasıetteri atadan balaǵa berilip keledi», - dedi Rýslan Álishev.
Onyń aıtýynsha, bıyl ulttyq baıqaýǵa qatysýǵa óńirden 69 otbasy nıet bildirgen.
Óńirlik kommýnıkatsııalar qyzmetiniń habarlaýynsha, ekinshi oryndy Taıynsha aýdanynan Shatarbaı shańyraǵy, úshinshi oryndy jambyldyq Máshikovter otbasy ıelendi. Birinshi orynǵa aıyrtaýlyq Ýshakovtar áýleti laıyq dep tanylsa, bas júlde Ýálıhanov aýdanynan kelgen úıelmen Muhamedıarovtarǵa buıyrdy.
Budan basqa 13 otbasy 6 nomınatsııa boıynsha marapattaldy. Baıqaý jeńimpazdaryna turmystyq tehnıka syıǵa berildi.
