SQO-da «Mereıli otbasy» baıqaýynyń jeńimpazy anyqtaldy
PETROPAVL. KAZINFORM – Petropavlda «Mereıli otbasy» ulttyq baıqaýynyń oblystyq kezeńi ótip, respýblıkaǵa óńir atynan baratyn úıelmen anyqtaldy.
Uıymdastyrýshylardyń aıtýynsha, bıyl dástúrli «Mereıli otbasy» baıqaýyna qatysýǵa 70 shaqty ótinish túsken, onyń 28-i oblystyq kezeńge jetti. Qatysqandardyń jartysy – kóp balaly otbasylar, budan bólek ár shańyraqtyń óz jetistikteri bar, biriniń ul-qyzy sportta chempıon bolsa, endi biri tabysty eńbek etip, qoǵam ómirine belsene qatysyp júr.
Nátıjesinde túrli synnan súrinbeı ótken Aqjar aýdany Talshyq aýylynan kelgen Hasenovter otbasy jeńimpaz dep tanyldy.
Otaǵasy Nurqasym ártis, ánshi, kúıshi, ózi oryndaıtyn ánderdiń avtory. Sondaı-aq, sportshy, aýdandyq «Qazaq aýyl» komandasynyń kapıtany. Áleýmettik jelide de belsendi, bloger qaıyrymdylyq is-sharalarǵa belsene aralasady.
Nurqasymnyń bastamasymen, jergilikti sharýa qojalyǵynyń qoldaýymen kópbalaly otbasy baspanaly boldy. Áleýmettik jelilerde aýyldastary qyzyǵa tamashalaıtyn «Túngi shaı», «Aýyldyń keshi kóńildi», «Shaıhana», «Ashylaıyq» atty túrli jobalar men baǵdarlamalardyń avtory.
2013 jyly shańyraq kótergen Nurqasymnyń kelinshegi Aqmaral mektepte psıholog bolyp jumys isteıdi. Qazir dekerttik demalysta, besinshi sábıine aıaǵy aýyr.
«2013 jyly osy baıqaýǵa meniń áke-sheshem qatysqan edi. Sol kisilerdiń izin jalǵap, baıqaýda bas júlde alyp jatqanymyzǵa qýanyshtymyn. Kóptegen tapsyrma boldy. Talap – shańyraqta otbasy qundylyǵy, bala tárbıesi birinshi orynda turýy kerek. Tórt qyzymyzdyń bireýin ónerge, bireýin sportqa baýlyp jatyrmyz», - deıdi Nurqasym Hasenov.
«Mereıli otbasy» ulttyq baıqaýynyń oblystyq kezeńinde qatysýshylar, sondaı-aq 6 atalym boıynsha da túrli marapatqa ıe boldy.
Buǵan deıin Petropavldaǵy SQÝ kolledjiniń bıyl jabylmaıtynyn jazǵan edik.
