SQO-da mereke kúnderi travmatologııaǵa 167 adam júgingen
PETROPAVL. QazAqparat – Soltústik Qazaqstan oblysynda sońǵy 5 kún ishinde Petropavl qalalyq kópsalaly aýrýhananyń jaraqat bólimshesine 167 adam qaralǵan, dep habarlaıdy QazAqparat tilshisi.
31 jeltoqsan men 4 qańtar aralyǵynda oblys ortalyǵyndaǵy kópsalaly aýrýhanaǵa jaraqat alǵan 167 adam qaraldy. Sonyń 75-i kóshede jaraqattanǵan. ıAǵnı biri kóshede taıyp qulap, aıaq-qolyn zaqymdasa, endi biri qatty aıazdan úsik alǵan.
«167 adamnyń 12-si aýrýhanaǵa jatqyzyldy. Sonyń ishinde jeteýin úsik shalǵan. Olardyń beseýin travmatologııalyq bólimshege jatqyzdyq, bireýi jansaqtaý bólimine tústi. Qatty úsik alǵan onyń jaǵdaıy aýyr. Qazir tıisti em-domdy alyp jatyr. Úsik shalǵandardyń basym bóligi, ıaǵnı 90% turǵylyqty mekenjaıy joq adamdar. Jastary orta eseppen 50-60-ta», - deıdi kópsalaly qalalyq aýrýhananyń travmatolog-ortopedi Valı Bedeshov.
Mamannyń aıtýynsha, bıyl úsik shalǵandar kóp. Qazir jaraqat bólimshesinde osyndaı 50-60 adam em alyp jatyr.
«Negizinen saýsaqtaryn, qoldaryn úsik shalǵan. Aıaqtary zardap shegedi. Kópshiligi bizge mas kúıde túsedi. Olarǵa aǵzany nyǵaıtatyn preparattar beriledi. 7-8 kúndeı emdeımiz, bolmaǵan jaǵdaıda úsigen jerin ampýtatsııalaýǵa týra keledi», - deıdi dáriger.
Úsik alýdan saqtanýdyń tıimdi joly – qatty aıazdarda múmkindiginshe úıden shyqpaý. Dáriger dúkenge, jumysqa barý kerek bolǵan jaǵdaıda qalyń ári yńǵaıly kıinýge keńes beredi. Ásirese aıaq kıimge mán berý qajet. Qysqy aıaq kıim jyly, ári bostaý bolǵany jón.
