SQO-da mereke kúnderi tártipti saqtaýǵa qansha polıtseı jumyldyrylady
PETROPAVL. QazAqparat – Soltústik Qazaqstan oblysynda mereke kúnderi qoǵamdyq tártip pen jol qaýipsizdigin qamtamasyz etý, joldarda júrgizýshilerge kómek kórsetý maqsatynda 500-den astam tártip saqshysy kezekshilikke túsedi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, polıtseıler barlyq mereke kúnderi kúsheıtilgen túrde qyzmet atqarady. Kún saıyn oblysta 500-den astam polıtsııa qyzmetkeri kezekshilikke túsedi.
Negizgi júk qalalyq tártip saqshylaryna artylmaq. 31 jeltoqsan saǵat 8.00-den 1 qańtar saǵat 8.00-ge deıin Petropavl joldarynda 31 avtopatrýl tártipti qadaǵalaıdy. Sondaı-aq, qalalyq patrýldik polıtsııa bataloniniń qyzmetkerleri statsıonarlyq modýlderde kezekshilik atqarady. Kóshelerdegi quqyqtyq tártip jaıaý jasaqtar quramyndaǵy 170-ten astam polıtsııa qyzmetkeri men Ulttyq ulannyń áskerı qyzmetshileriniń baqylaýynda bolady. 37 qyzmetker jańa jyldy dalada qarsy almaq. Olar Petropavldaǵy ortalyq alańdarda, shyrsha janynda kezekshilik etip, merekeni qarsy alýǵa kelgen adamdardyń qaýipsizdigin saqtaıdy. Jalpy, jańa jyl túninde Petropavldaǵy quqyqtyq tártipke 135 polıtseı men 75 áskerı qyzmetshi – barlyǵy 210 adam jaýap beredi.
SQO PD bastyǵynyń birinshi orynbasary Qanat Aıtbaevtyń aıtýynsha, basty mindet – mereke kúnderinde oblys turǵyndarynyń Jańa jyl meıramyn tynysh qarsy alýyn qamtamasyz etý.
Sınoptıkterdiń boljamy boıynsha SQO-da aldaǵy mereke kúnderi qatty aıaz bolmaq. Sondyqtan polıtseıler men qutqarýshylar bul kúnderi alys jolǵa shyqpaýǵa, shyqqan kúnde de júrgizýshige asa qajet zattardy alyp júrýge keńes beredi.
