SQO-da mereke kúnderi 60 tehnıka qar qursaýynan shyǵarylǵan
PETROPAVL. QazAqparat - Soltústik Qazaqstan oblysynda 8-11 naýryz aralyǵynda 112 telefon nómirine 5 717 telefon qońyraýy túsken. Onyń 3 myńy aýa raıynyń qolaısyzdyǵyna jáne oblys avtojoldarynyń jaǵdaıyna baılanysty bolǵan, dep habarlaıdy QazAqparat tilshisi.
Soltústikqazaqstandyq qutqarýshylar turǵyndardyń eskertýlerdi elemeıtindigine narazy.
Mamandardyń aıtýynsha, saldarynan qosymsha kúsh jumyldyryp, jolda qalǵan jolaýshylar men tehnıkany qar qursaýynan shyǵarýǵa týra keledi. Osylaısha 4 kúnniń ishinde Tótenshe jaǵdaı qyzmeti qar keptelisinde qalǵan 182 adamdy, onyń ishinde 10 balany jáne 60 tehnıkany shyǵaryp aldy.
«SMS habarlamany alsa da, telefon arqyly habarlasyp, joldyń jabylǵanyn bilse de turǵyndar jolǵa shyǵady. Máselen 7-naýryz kúni túngi 23:15-te bir azamat 112 telefon nómirine qońyraý shalyp, Tımırıazev aýdanynyń Aqsýat aýylynan shyǵatyn joldyń bar-joqtyǵyn bilgen. Oǵan mamandar joldyń joqtyǵyn, ózin jáne jolaýshylarynyń basyn qaýipke tikpeý úshin sapardy tańǵa qaldyrýǵa keńes bergen. Bir saǵattan keıin jańaǵy adam kóligimen Aqsýat aýylynyń janynda turǵandyǵyn, kishkentaı balanyń barlyǵyn aıtyp kómek suraǵan. Jergilikti atqarýshy organdardyń jáne aýdandyq qutqarýshylardyń kómegimen kólik Tımırıazev eldimekenine deıin jetkizildi. Mundaı jaǵdaılar, ókinishke oraı, jıi kezdesedi», - deıdi oblystyq Tótenshe jaǵdaı departamenti bastyǵynyń orynbasary Erik Sarybaev.
Mamandardyń aıtýynsha, naýryzdyń 7-11-i aralyǵynda «Qazgıdromet» RMK óńirde 4 ret aýa raıynyń buzylatyndyǵy jóninde habarlaǵan. Turǵyndar BAQ arqyly jáne 500 myńnan astam abonentke SMS habarlama jiberip eskertilgen.
