SQO-da mereke kúnderi 57 sábı dúnıege keldi
PETROPAVL. QazAqparat – Soltústik Qazaqstan oblysynda mereke kúnderi 57 sábı týsa, altaýy jańa jyldyń túninde dúnıege keldi, dep habarlaıdy QazAqparat tilshisi.
Oblystyq Densaýlyq saqtaý basqarmasy baspasóz qyzmetiniń habarlaýynsha, Jańa jyl túninde oblystyq perınataldyq ortalyqta dúnıege kelgen sábıdiń úsheýi ul, úsheýi qyz bolǵan. Jańa jylda túngi saǵat 00.50-de eń birinshi qyz bala dúnıege kelgen. Salmaǵy 3850 gramm, boıy 55 sm bolyp týǵan náresteniń de, anasynyń da jaǵdaıy jaqsy. Búginde úıine jiberilgen.
«Jańa jyl túni ortalyqta 8 maman kezekshilik etti. Tún ádettegideı tynysh ótti. Sol túni týǵan analardy sábılerimen úılerine jiberdik», - deıdi oblystyq perınataldyq ortalyqtyń dırektory Janna Maýytova.
Bıyl 31 jeltoqsan men 5 qańtar aralyǵynda oblys aýmaǵynda 57 sábı ómirge keldi.
Aıta keterligi, byltyr óńirde jańa jyl túni 22 náreste dúnıege keldi. 16 sábı oblystyq perınataldyq ortalyqta, qalǵandary Ǵabıt Músirepov, Esil jáne Aıyrtaý aýdandardaǵy bólimshelerde týǵan eken.
