SQO-da mereke kúnderi jedel járdem qyzmetine eki myńnan asa shaqyrtý túsken

PETROPAVL. KAZINFORM — Soltústik Qazaqstan oblysynda mereke kúnderi jedel járdem qyzmeti kúsheıtilgen rejımde jumys istedi.

SQO densaýlyq saqtaý basqarmasy baspasóz qyzmetiniń málimetinshe, 31 jeltoqsanda oblys boıynsha — 391, al, 1 qańtardan bastap kúndelikti 400-den astam shaqyrtý túsip otyrǵan. Onyń ishinde kóshede jaraqat alý da, JRVI-de, ınfarkt, ınsýlt te bar. Jalǵan shaqyrtýlar da tirkelgen. 

Al 31 jeltoqsan men 4 qańtar aralyǵynda Petropavl qalalyq kópbeıindi jedel medıtsınalyq kómek aýrýhanasynyń jaraqat bólimine 300 adam júgingen. Olardyń onyn jedel túrde aýrýhanaǵa jatqyzýǵa týra keldi.

Dárigerlerdiń aıtýynsha, turǵyndardyń basym bóligi — 151-i jaraqatty kóshede jáne 140-y úı jaǵdaıynda alǵan. Budan bólek alty adam sporttyq jaraqatpen júgingen. Jol-kólik oqıǵasynda eki adam, óndiriste bir adam jaraqattandy.

Al jaraqat túrlerine keler bolsaq, toǵyz adam kúıip qalǵan, bes adamdy janýarlar tistegen. Basym kópshiligi súıegi synyp, dárigerge qaralǵan.

Buǵan deıin Germanııada jańa jyl túni ondaǵan polıtseı pırotehnıkadan jaraqat alǵanyn jazǵan edik.