SQO-da mereke qarsańynda jas polıtseıler erlik jasaǵan áriptesterimen kezdesti
SQO polıtsııa departamenti baspasóz qyzmetiniń málimetinshe, kezdesý beınekonferentsııa formatynda ótti. Jas qyzmetkerlermen áńgimelesýge bes polıtseı keldi. Olardyń barlyǵy qoǵamdyq tártipti saqtaýda «aldyńǵy shepte» júretin bólinis – patrýldik polıtsııa qatarynda qyzmet etedi. Olardyń jumysy joldaǵy qaýipsizdikti baqylaýmen ǵana shektelmeıdi. Patrýldik polıtsııa shaqyrtý boıynsha alǵashqynyń biri bolyp oqıǵa ornyna keledi, qajet bolǵan jaǵdaıda shuǵyl áreket etip, adam ómirin aman saqtap qalatyn sheshim qabyldaýy qajet.
Rýslan Akmatov óz-ózine qol jumsaýǵa shaq turǵan boıjetkendi aman alyp qaldy. Sol úshin Esil ózeni arqyly ótetin kópirdiń 25 metrlik arkasyna shyǵýyna týra kelgen.
Sultan Qýanyshev pen Erlan Dankın adamdardy órtten qutqaryp qaldy.
Azat Zeınolov ýly ıiske toly kessonǵa túsip, qabyrǵany syrlap jatyp ýlanǵan eki er adamdy alyp shyqty.
Qanat Fazylov 2016 jyly jol-kólik oqıǵasynda zardap shekken áıeldi qutqarǵan. Esil aýdanynda otbasy mingen Audi kóligi joldan shyǵyp ketip, aýdarylǵan, jol shetindegi kólge qulaǵan. Ýaqtyly jetken polıtseıler men sol mańdaǵy adamdar sýǵa tolǵan salon ishinen qaýipsizdik beldigin kesip, essiz kúıdegi áıel jolaýshyny jolǵa alyp shyqqan. Qanat Fazylov ony jasandy demaldyryp, júregine massaj jasaǵan, keıin áıel esin jıyp, óz-ózine kelgen.
«Biz pogon taqqannan keıin adamdardyń ómirleri men densaýlyqtary úshin jaýaptymyz. Bizdiń ár adam ózin qaýipsiz sezinýi úshin qyzmet etemiz», - deıdi Qanat Fazylov.
Qanat – Táýelsizdiktiń qurdasy. Búgin ol polıtsııa aǵa leıtenanty, biraq ofıtser ataǵyn alǵanǵa deıin adamdardy ottan qutqarǵan, sýıtsıdtiń aldyn alǵan jáne «Erligi úshin» memlekettik nagradasymen marapattalǵan.
«Batyldyq pen kásibılik polıtseılerge úlgi bolýy qajet. Osyndaı is-sharalar jeke quramdy patrıottyqqa tárbıeleıdi, rýhtaryn kóteredi, áriptesterine jáne jerlesterine degen maqtanysh sezimin uıalatady», - deıdi SQO PD bastyǵy Marat Tólebaev.
