SQO-da memorgan 1 keli makarondy 17 mln teńgeden satyp almaq bolǵan
SQO Sybaılas jemqorlyqqa qarsy qyzmetiniń málimetinshe, departament satyp alýdyń biryńǵaı terezesi portaly arqyly memlekettik satyp alý júıesine turaqty negizde monıtorıng júrgizip turady.
Bıyl osyndaı qadaǵalaýdyń nátıjesinde josparlanǵan satyp alý baǵasyn kóterýdiń 32 faktisi anyqtaldy, ol boıynsha 24 memlekettik organda baǵany tómendetý boıynsha sharalar qolǵa alyndy.
Máselen, oblystyq ftızıopýlmonologııa ortalyǵynyń basshylyǵy departamenttiń usynym hatynan keıin jalpy somasy 150 mln teńgege 100 myń respırator satyp alýdan bas tartty.
Aıta ketý kerek, bir jeke qorǵanys quralynyń ortasha baǵasy - 493 teńge.
«Departamenttiń sarapshylary onlaın rejıminde memlekettik satyp alý kezinde sybaılas jemqorlyq táýekelderin anyqtaıdy. Bul portaldyń basty artyqshylyǵy – avtomatty túrde basqa aımaqtarmen salystyrǵanda tapsyrys berýshilerdiń baǵasy qanshalyqty joǵary ekenin kórsetedi. Ortasha, qalypty baǵalardyń shaǵyn «dálizi» alynady. Usynys hattarda biz osy portaldan alynǵan málimetterdi kórsetemiz, tapsyrys berýshige qandaı baǵa eń tómen, al qaısysy joǵary ekeni túsinikti bolady», - dedi SQO Sybaılas jemqorlyqqa qarsy qyzmet basshysynyń birinshi orynbasary Nurlan Jahın.
Nurlan Jahın qate málimetter jıi kezdesetinin atap ótti.
«Petropavl qalasynyń áleýmettik beıimdeý ortalyǵy 17 776 750 teńgege bir kg makaron satyp alýdy josparlaǵan. Sybaılas jemqorlyqqa qarsy qyzmettiń aralasýynan keıin kelisin 250 teńgemen jalpy somasy 23 250 teńgege makaron ónimderin satyp alý týraly sheshim qabyldandy. Sondaı-aq, Aqjar aýdany Aısary aýyldyq okrýgi ákimi apparaty 48,1 mln teńgeni tıimsiz jumsamaq bolǵan. Memlekettik organ aldaǵy jylytý maýsymyna tonnasyn 933 812 teńgemen 52 tonna kómir satyp alýdy josparlaǵan», - deıdi Nurlan Jahın.
