SQO-da memlekettik satyp alý talaptary buzylyp, 11,2 mln teńge qaıtaryldy

ASTANA. KAZINFORM – Soltústik Qazaqstan oblysynyń prokýrorlary memleket kirisine somasy 11,2 mln teńgege saqtandyrý tólemderin óndirip aldy. 

Júrgizilgen taldaý barysynda «Memlekettik satyp alý týraly» zańnyń talaptaryn buzý faktileri anyqtaldy, olar memlekettik satyp alý sharttary boıynsha mindettemelerdiń tıisinshe oryndalmaýy nátıjesinde keltirilgen múliktik zalaldy óndirý jóninde tapsyrys berýshi tarapynan sharalar qabyldanbaýynan kórinis tapqan.

Atap aıtqanda, Shal aqyn aýdanynda jalpy bilim beretin mektepterdi kúrdeli jóndeý boıynsha memlekettik satyp alý sharttaryn iske asyrý kezinde merdiger sharttyq mindettemelerdiń oryndalýyn qamtamasyz etý retinde azamattyq-quqyqtyq jaýapkershilikti erikti saqtandyrý sharttaryn usynǵan.

— 2023–2024 jyldarǵa zańdy kúshine engen sot aktilerimen merdigerdiń óz sharttyq mindettemelerin tıisinshe oryndamaý faktileri anyq jáne dáleldi túrde belgilengen.

Soǵan qaramastan, aýdannyń bilim bólimi (tapsyrys berýshi) zańnyń 43-babynyń talaptaryn buza otyryp, uzaq ýaqyt boıy sharttardyń oryndalýyn qamtamasyz etý retinde usynylǵan saqtandyrý somasyn óndirý boıynsha jalpy somasy 11,2 mln teńge kóleminde sharalar qabyldamaǵan, — delingen Soltústik Qazaqstan oblysynyń prokýratýrasy taratqan habarlamada.

Prokýrorlyq qadaǵalaý aktisi boıynsha sot tártibimen saqtandyrý tólemderi tolyq kólemde memleket kirisine óndirildi, bul memlekettiń materıaldyq múddelerin qalpyna keltirýge jáne qorǵaýǵa múmkindik berdi.

Aıta ketelik biryńǵaı memlekettik satyp alý platformasyna 120 myń qazaqstandyq jetkizýshi tirkelgen.