SQO-da memlekettik múlikti tıimdi paıdalaný bıýdjetke 36 mln teńgeden astam tabys ákeldi
PETROPAVL. KAZINFORM - Soltústik Qazaqstan oblysynda memlekettik múlikti tıimdi paıdalaný maqsatynda byltyr aýqymdy túgendeý júrgizilip, bos jatqan jáne artyq paıdalanylyp otyrǵan nysandar anyqtaldy.
Soltústik Qazaqstan memlekettik múlik jáne jekeshelendirý departamentiniń málimetinshe, memlekettik mekemeler ıeligindegi ǵımarattar men úı-jaılarǵa taldaý jasalyp, olardyń qanshalyqty tıimdi paıdalanylyp otyrǵany baǵalanǵan. Nátıjesinde birqatar artyq alańdardy jalǵa berý jáne memlekettik uıymdar arasynda qaıta bólý týraly sheshim qabyldandy.
Túgendeý qorytyndysy boıynsha Petropavldaǵy memlekettik múlik jáne jekeshelendirý departamentiniń ǵımaratynda ornalasqan bes nysandy jalǵa berý usynyldy. Onyń ishinde jalpy aýdany 94 sharshy metr bolatyn tórt nysan jalǵa tapsyryldy.
Sonymen qatar SQO boıynsha Memlekettik kirister departamentiniń 25 nysany jáne sanıtarııalyq-epıdemıologııalyq baqylaý departamentiniń 13 nysany jalǵa berýge usynylǵan.
Artyq paıdalanylyp otyrǵan alańdardyń bir bóligi basqa memlekettik mekemelerdiń qajettiligine óteýsiz negizde berildi. Máselen, energetıkalyq qadaǵalaý jáne baqylaý salasyndaǵy aýmaqtyq departamentke 130 sharshy metr, jerlerdi zertteý jumystaryn júrgizý jónindegi memlekettik ınstıtýtqa 126 sharshy metr, al respýblıkalyq fıtosanıtarııalyq dıagnostıka jáne boljamdar ádistemelik ortalyǵyna 83 sharshy metr bólindi.
Sondaı-aq Maǵjan Jumabaev aýdandyq jer qatynastary bólimine, sanıtarııalyq-epıdemıologııalyq baqylaý departamentine jáne Ǵabıt Músirepov atyndaǵy aýdannyń Otbasyn qoldaý ortalyǵyna da qosymsha jumys alańdary berildi.
Budan bólek, qazir SQO Ádilet departamentine tıesili jalpy aýdany 85 sharshy metr bolatyn bos úı-jaılardy óteýsiz paıdalanýǵa berý boıynsha rásimder júrgizilip jatyr.
Mamandardyń aıtýynsha, mundaı jumystar memlekettik múlikti tıimdi basqarýǵa, bos turǵan nysandardy aınalymǵa engizýge jáne bıýdjet qarajatyn únemdeýge múmkindik beredi.
- Byltyr múlikti jalǵa berýge qatysty barlyǵy 30 shart jasaldy. Jalǵa berilgen nysandardyń jalpy aýdany 1 778,77 sharshy metr. Aı saıynǵy jaldaý tólemderiniń jıyntyq kólemi 3,2 mln teńge. Júrgizilgen jumystardyń nátıjesinde bir jylda múliktik jaldaýdan bıýdjetke 36,2 mln teńge túsim tústi. Bul kórsetkish josparlanǵan kólemnen aıtarlyqtaı joǵary. Atap aıtqanda, esepti kezeńge 25 mln josparlanǵan edi, - deıdi departament basshysy Nurjan Islambekov.
Buǵan deıin Qazaqstannyń Qarjy mınıstrligi kvazımemlekettik sektordyń jekelegen sýbektileri júzege asyratyn satyp alý erejelerine ózgerister engizgenin jazǵan edik.
