SQO-da memlekettik rámizder kúnine oraı birneshe aktsııa ótti
Petropavldaǵy M.Jumabaev kóshesindegi 101-úı, N.Nazarbaev kóshesindegi 119-úı jáne Sh.Ýálıhanov kóshesindegi 46-úıdiń balkondarynda kesheden beri kók tý jelbirep tur. Qalalyq ákimdiktiń málimetinshe, bul – páter ıeleri kooperatıvi men turǵyndardyń bastamasy.
Sondaı-aq búgin merekege oraı Petropavldyń ortalyq alańynda memlekettik rámizderge qurmet kórsetildi. Tuǵyrǵa saltanatty túrde SQO-daǵy eń úlken kók baıraq kóterildi. Flagshtoktyń uzyndyǵy – 50 metr, týdyń uzyndyǵy 10 metr bolsa, eni – 5 metr.
«Tý kóterý rásimine 30-ǵa jýyq volonter qatysty. Jalpy bizdiń maqsatymyz – jastar boıynda patrıottyq sezimdi oıatý. Sonymen qatar, saýda jáne oıyn-saýyq ortalyqtarynyń janynda volonterler avtokólikterge arnalǵan jalaýlardy tegin taratady. 400 jalaý daıyndadyq», - deıdi Petropavl qalalyq jastar resýrstyq ortalyǵynyń dırektory Álfarabı Myńbaı.
Al memlekettik mekemeler jumys kúnin Ánuran aıtýmen bastady. Solardyń ishinde Soltústik Qazaqstan oblysy boıynsha qylmystyq atqarý júıesi departamentiniń 400-ge jýyq qyzmetkeri de bar.
Departament ǵımaratynda, sondaı-aq oblys mekemelerinde qyzmetshiler bir mezgilde ánurandy shyrqap, Memlekettik rámizderge qurmet kórsetti.
«Kóńil-kúı kóterińki. Osydan bir jyl buryn Ánuran oryndalǵannan keıin Otanyma adal qyzmet etýge ant qabyldap, jumysqa ornalasqan edim. Áriptesterimdi, barlyq qazaqstandyqtardy búgingi merekemen quttyqtaımyn. Memlekettik rámizder – bizdiń eldigimizdiń belgisi, ony qumetteý – árkimge paryz», - deıdi SQO boıynsha QAJD ES-164/6 mekemesiniń baqylaý qyzmeti bóliminiń baqylaýshysy Danagúl Dosanova.
