SQO-da memlekettik qyzmetshiler ym tilin meńgerip jatyr
Memlekettik qyzmet isteri agenttiginiń SQO boıynsha departamenti baspasóz qyzmetiniń málimetinshe, departamenttiń bastamasymen uıymdastyrylǵan ym tiliniń kýrsy onlaın formatta ótip jatyr.
Ym tilin meńgerý kýrstaryna halyqqa memlekettik qyzmet túrlerin usynatyn memlekettik organdar men uıymdardyń qyzmetkerleri qatysady.
«Memlekettik qyzmetshilerge tájirıbeli sýrdoaýdarmashylar dáris oqıdy. Tyńdaýshylar daktıldi álippeni meńgeredi. Qazir 30 adam kýrsta oqyp jatyr. Olar aýdandyq halyqqa qyzmet kórsetý ortalyqtarynyń, jumyspen qamtý jáne áleýmettik baǵdarlamalar bóliminiń, jumyspen qamtý ortalyqtarynyń qyzmetkerleri jáne ákimdikterdiń ókilderi», - deıdi Memlekettik qyzmet isteri agenttiginiń oblystyq departamentiniń bas mamany Ásel Áýbákirova.
Sabaq aptasyna eki ret 2 saǵattan ótedi.
«Daktıldi sóıleýdiń basty ereksheligi – naqtylyq. Ár jaǵdaıdyń óz ym-ısharasy bar. Ym arqyly zattardy ǵana emes, qubylys, oqıǵany da kórsetýge bolady. Eger adam qolyn qımyldatyp ym jasasa, ol belgili bir is-qımyldyń belgisi. Ym-ıshara beınelep qana kórsetedi. Mysaly, úıdi kórsetý úshin adam qolyn shatyrǵa uqsaıtyndaı etip búgedi. Al súıispenshilikti bildirý úshin saýsaqtaryn júrek tusyna qoıady», - deıdi sýrdoaýdarmashy Naǵıma Saýtova.
«Ym-ıshara tiliniń negizderi» atty tegin kýrs 28 shildege deıin jalǵasady. Kýrs aıaqtalǵan soń tyńdaýshylar emtıhan tapsyryp, tıisti sertıfıkatqa ıe bolady.
Mundaı dárister byltyr da uıymdastyrylǵan edi. Búginde kýrstardan ótken memlekettik organnyń 101 qyzmetkeri osyndaı sertıfıkatqa ıe.
