SQO-da memlekettik kásiporyn balyqtyń kelisin 12 myń teńgeden almaq bolǵan

PETROPAVL. QazAqparat – Soltústik Qazaqstan oblysy sybaılas jemqorlyqqa qarsy qyzmet memlekettik satyp alýǵa monıtorıng júrgizip, byltyr 2 mlrd teńge bıýdjet qarjysyn únemdedi, dep habarlaıdy QazAqparat tilshisi.

SQO sybaılas jemqorlyqqa qarsy qyzmettiń basshysy Sergeı Perovtyń aıtýynsha, maman-analıtıkter memlekettik satyp alý júıesin nazarda ustap, kúndelikti monıtorıng júrgizedi.

Maqsat – bıýdjet qarajatynyń tıimdi jumsalýyn baqylaý.

«Josparlaý barysynda taýar baǵasynyń qoldan birneshe esege qymbattaýyna jol bermeý maqsatynda jumys júrgiziledi. Bizdiń analıtıkter «satyp alýdyń biryńǵaı terezesi» arqyly sybaılas jemqorlyq belgileri bar tapsyrys berýshilerdi anyqtaıdy. Onyń nátıjesi keıin «táýekel tobyndaǵy» bıýdjettik baǵdarlamalardyń barlyq ákimgerlerine jiberiledi. Osylaısha olarǵa adekvatty baǵa qoıýǵa múmkindik beremiz», - deıdi Sergeı Perov.

Byltyr osyndaı monıtorıngterdiń nátıjesinde, josparlanǵan satyp alý baǵasyn kóterýdiń 96 deregi anyqtaldy.

49 memlekettik organ baǵany tómendetý boıynsha shara qoldandy. Nátıjesinde bıýdjettiń 2 mlrd astam teńgesi únemdeldi.

«Eńbek-Qyzyljar» memlekettik kásipornynyń fılıaly mıntaı balyǵynyń kelisin 12 myń teńgeden alýdy josparlaǵan. Nátıjesinde 150 mln teńge únemdeldi. Tek bıylǵy qańtar aıy boıynsha ǵana 14 memlekettik organǵa 19 usynym hat joldandy. Olar memlekettik satyp alýdaǵy ózderiniń josparyn qaıta qarap, 170 mln teńgeni únemdedi», - deıdi sybaılas jemqorlyqqa qarsy qyzmettiń basshysy.