SQO-da memlekettik baǵdarlama boıynsha turǵyn úılerdi saýdalamaq bolǵan alaıaqtar sottaldy
PETROPAVL. QazAqparat - Petropavlda azamattarǵa memlekettik baǵdarlama arqyly páter alýǵa kómektesýge ýáde bergen úsh áıelge qatysty úkim shyqty.
Bul týraly «QazAqparat» HAA tilshisi Petropavl qalalyq sotynyń baspasóz qyzmetine silteme jasap habarlady.
Sot materıaldaryna qaraǵanda, Sara Taıjanova, Álfııa Jýkenova jáne Oksana Voıdılo 2012 jyldan 2015 jylǵa deıin ózderin Astana jáne Petropavl qalalarynyń ákimdikteriniń qyzmetkeri retinde tanystyryp, turǵyn úımen baılanysty jaǵdaılaryn jaqsartýǵa jáne tómen baǵamen páter satyp alýǵa járdemdesýge ýáde bergen.
Rasynda ákimdikter men turǵyndardy turǵyn úımen qamtamasyz etý boıynsha baǵdarlamalarǵa olardyń eshqandaı qatysy bolmaǵan.
«A.Jýkenova, O.Voıdılo, S.Taıjanova japa shegýshilerdi jaqyn arada páter alatynyna aldaý arqyly sendirgen. Zardap shegýshiler olardyń alaıaqtyǵyn bilmeı, aılakerlerge túrli somada aqsha bergen. Qylmystyq áreketteri arqyly áıelder 23 japa shegýshige jalpy somasy 94 000 000 teńgeden asatyn materıaldyq zalal keltirdi», - delingen is materıaldarynda.
Sotta Sara Taıjanova men Oksana Voıdılo kinásyn moıyndamady, aıyptalýshy Álfııa Jýkenova kinásyn tolyq moıyndady.
Petropavl qalalyq soty atalǵan azamattardyń barlyǵyn kináli dep taýyp, olardy ártúrli merzim boıynsha bas bostandyǵynan aıyrý jóninde sheshim qabyldady.
