SQO-da memlekettik aýdıt kezinde 6,2 mlrd teńgeniń zańbuzýshylyǵy anyqtalǵan

PETROPAVL. QazAqparat – Soltústik Qazaqstan oblysynda byltyr aýdıtorlyq tekseris kezinde jalpy somasy 6,2 mlrd teńgeniń zań buzýshylyǵy anyqtaldy. Nátıjesinde 284 adam jazalandy, sonyń ishinde bireýi jumysynan bosatyldy, dep habarlaıdy QazAqparat tilshisi.

Jetinshi shaqyrylǵan SQO máslıhatynyń kezekten tys XVII sessııasy ótti.

Jıynda oblystyq bıýdjettiń oryndalý jaǵdaıy da aıtyldy.

Jıynda sóz alǵan SQO boıynsha revızııalyq komıssııa tóraǵasy Tilegen Qaskın komıssııasy qyzmetiniń negizgi kórsetkishterine toqtaldy.

Tilegen Qaskınniń aıtýynsha, byltyr 15 aýdıtorlyq jáne 6 saraptamalyq-taldaý is-sharalary 55 nysanda júrgizilip, 99 mlrd teńge qamtyldy. Sonyń 6,2 mlrd teńgesi boıynsha zańbuzýshylyqtar anyqtaldy. Onyń ishinde 4,9 mlrd teńge qarjylyq zańbuzýshylyqtar bolsa, 716,2 mln teńge bıýdjet qarajaty tıimsiz paıdalanylǵan, 601,4 mln teńge tıimsiz josparlaýǵa qatysty. Budan basqa 33,7 mln teńge somasynda bıýdjettiń tikeleı shyǵyndary, 314 rásimdik buzýshylyqtar, 4 júıelik buzýshylyqtar anyqtaldy.

«Zańbuzýshylyqtardyń negizgi somasy 5,9 mlrd teńge - bıýdjet qarajatyn jumsaýǵa qatysty anyqtalǵan. Búgingi kúni 4,6 mlrd teńge nemese 95%-y bıýdjetke qaıtaryldy. Ótelmegen qarajat 263,7 mln teńge, onyń ishinde 68,9 mln teńge boıynsha oryndaý merzimi jetken joq, 149,2 mln teńge boıynsha merziminde óteý boıynsha sharalar qabyldanbady jáne 45,6 mln teńge qaıtarý múmkin bolmaǵandyqtan shyǵyn retinde alynyp tastaldy. Mamandar negizinen býhgalterlik esep júrgizý kezinde zańbuzýshylyqtarǵa jol bergen», - deıdi revızııalyq komıssııa tóraǵasy.

Revızııalyq komıssııasy ótkizgen aýdıtorlyq is-sharalardyń qorytyndysy boıynsha 86 usynym men tapsyrma berilgen.

Aýdıt qorytyndysy boıynsha 284 tulǵa jaýapqa tartyldy, onyń ishinde 170-i ákimshilik jaýapkershilikke, 114-i tártiptik jaýapkershilikke, sonyń ishinde 69-y eskertý, 38-i sógis, 6-ýy qatań sógis jáne bir adam jumystan bosatyldy. Salynǵan aıyppul - 3,9 mln teńgeni quraǵan.