SQO-da memleketke 68 mln teńge shyǵyn keltirgen brakonerler sottaldy

PETROPAVL. KAZINFORM – Soltústik Qazaqstan oblysynda zańsyz ańshylyqpen aınalysqan uıymdasqan qylmystyq top sottaldy. 

SQO prokýratýrasynyń málimetinshe, 23 sáýirde uıymdasqan qylmystyq top quryp, zańsyz ańshylyqpen aınalysqandarǵa qatysty úkim zańdy kúshine endi.

Sotta bultartpas dálelder bola tura, tórt aıyptalýshy jasaǵan qylmystary úshin óz kinálaryn moıyndamaı, isterine ókinbegen.

Soǵan qaramastan, memlekettik aıyptaýshy Petropavl qalasynyń 4 turǵynynyń oblys ortalyǵynyń mańynda 53 elikti zańsyz atyp, memleketke 68 mln teńgeden astam shyǵyn keltirgenin dáleldedi.

Petropavl qalalyq soty prokýratýranyń pikirimen kelise otyryp, barlyǵyn 8 jyldan 11 jylǵa deıin bas bostandyǵynan aıyryp, olardan keltirilgen materıaldyq shyǵyndy óndirip alýǵa úkim shyǵardy.

Esterińizge salaıyq, byltyr aqpan aıynda SQO polıtsııa departamentiniń uıymdasqan qylmysqa qarsy kúres basqarmasy, vedomstvonyń basqa bólimshelerimen birge asa iri mólsherde zańsyz ań aýlady degen kúdikpen Petropavldyń úsh turǵynyn ustaǵan edi. Olardyń kóliginen jáne saıajaı qoǵamdastyǵyndaǵy úılerdiń birinen 50-den astam eliktiń bas-sıraǵy men terisi jáne ekeýiniń tutas eti tabyldy.