SQO-da memqyzmetshiler jumys ýaqyty aıaqtalsa da, nege úılerine qaıtpaıdy

PETROPAVL. QazAqparat – Soltústik Qazaqstan oblysy boıynsha memlekettik qyzmet isteri departamentiniń mamandary memorgandardy saýalnama júrgizdi, dep habarlaıdy QazAqparat.

Departamenttiń memqyzmet salasyndaǵy baqylaý basqarmasynyń bas mamany Sultan Magomedovtyń aıtýynsha, saýalnamanyń maqsaty – memqyzmetkerlerdiń óz mindetinen artyq jumystarǵa tartylatyn nemese tartylmaıtynyn anyqtaý. Saýalnama suraqtaryna 10 mekemeniń qyzmetkerleri jaýap bergen.

«Saýalnamany atalmysh mekemelerde jumys isteıtin 348 memqyzmetshi toltyrdy. Olardyń jartysyna jýyǵy jasyryn jaýap berdi», - deıdi S.Magomedov.

Memqyzmetshilerge «Basshylyq mereke nemese demalys kúnderi jumysqa shyǵýǵa májbúrleı me?» degen sııaqty suraqtar qoıylǵan. «Jumys ýaqyty aıaqtalsa da, keńsede qalyp ári qaraı jumys isteýge ne sebep?» degen suraqqa kóbisi jumystyń, júktemeniń kóptigin, mamandar tapshylyǵyn, shuǵyl tapsyrma túskenin, esep daıyndaý kerektigin, basqa da sebepterdi tizip shyqqan.

«Sottar ákimshisi, memkirister departamenti, kásipkerlik jáne týrızm, mádenıet, arhıv jáne qujattama, energetıka jáne TKSh basqarmalarynyń qyzmetkerleri mereke jáne demalys kúnderi jumysqa shyǵatyndaryn moıyndaǵan», - dep atap ótti bas maman.

Ádep keńesiniń tóraǵasy Elena Stepanenkonyń aıtýynsha, atalmysh memorgandarda qaıtadan saýalnama júrgizip, jaǵdaıdyń qalaı ózgergenin baıqaý kerek jáne tıisti sharalar qabyldaý qajet.