SQO-da mektepterdi kúrdeli jóndeýge 5 mlrd teńge bólindi
PETROPAVL. QazAqparat - Bıyl Soltústik Qazaqstan oblysynda mektepterdiń jóndeý jumystaryna jyldaǵydan 12 ese kóp qarajat bólindi, dep habarlaıdy QazAqparat tilshisi.
SQO ákimi baspasóz qyzmetiniń habaralýynsha, oqý jyly aıaqtalysymen-aq mektepterde kúrdeli jóndeý jumystary bastaldy. Oblys ákimi atqarylyp jatqan jumystardy únemi nazarda ustamaq. Qumar Aqsaqalov Petropavldaǵy jóndeýdi qajet etetin mektepterde bolyp, atqarylyp jatqan jumystardyń sapasyn kórdi. Keı bilim ordalarynda aýqymdy jóndeý jumystary ǵımarat paıdalanýǵa berilgeli atqarylmaǵan. Birinshi kezekte nysannyń shatyry, terezeleri men jylytý júıesi aýystyrylýy qajet. Jaryqtandyrýǵa da asa mán beriledi.
«Balalarǵa jyly, jaryq ári yńǵaıly bolýy kerek. Basty prıntsıp osy. Oqýshylar synyptarda tońyp júretin jáıtter bar. Jóndeýden keıin balalar, muǵalimder men ata-analarǵa jaqsy jaǵdaı jasalady», - dedi Qumar Aqsaqalov.
Óńir basshysy qala basshylyǵyn, bilim basqarmasy men merdigerlerdi jumystyń sapasyna mán berýdi tapsyrdy. Jóndelgen mektep bir-eki jyldan keıin qaıta eskirmeı, kóptegen jyldarǵa jetýi kerek.
«Búgin kóptegen mektepti aralap shyqtym. Keı nysandarda qurylysshylardyń jibergen qatelikterin kórdim. Olar jumystaryn sapaly atqarýy úshin qadaǵalap, baǵyttap otyrý qajet. Qurylystyń barysy qalanyń, aýdan ákimderiniń, bilim bólimderiniń únemi nazarynda bolsyn. Mysaly, tereze durys salynbasa oǵan jaýaptylar jumysynan ketsin. Al merdiger aıyppul tóleıdi», - dedi oblys ákimi.
Mektepterdiń jóndeý jumystaryn óńir basshysy Qumar Aqsaqalov ózi de qadaǵalamaq. Jalpy bıyl 5 mlrd teńgege 120 bilim ordasy jóndeledi. Onda shamamen 35 myń bala oqıdy eken. Bul óńirdegi barlyq oqýshylardyń teń jartysy.
