SQO-da mektepterdi kúrdeli jóndeýge 2,4 mlrd teńge bólindi

PETROPAVL. QazAqparat – Bıyl Soltústik Qazaqstan oblysynda bilim berý nysandaryn kúrdeli jóndeýge 2,4 mlrd teńge bólinse, sonyń 1,9 mlrd teńgesi «Aýyl – el besigi» baǵdarlamasy boıynsha berildi, dep habarlaıdy QazAqparat tilshisi.

SQO ákimdiginiń otyrysynda bilim berý nysandarynyń jańa oqý jylyna daıyndyǵy pysyqtaldy. Óńirde 472 mektep bar, bıyl oqýshy sany 75 myńǵa jetpek. Ótken jylmen salystyrǵanda 500 balaǵa kóp. 7,3 myń búldirshin alǵash ret mektep tabaldyryǵyn attaıdy.

Bıyl bilim ordalaryn kúrdeli jóndeýge 2,4 mlrd teńge bólindi. Onyń 1,9 mlrd teńgesi «Aýyl - el besigi» baǵdarlamasy boıynsha berildi. Bul qomaqty qarajatqa 26 mektep jańartylady.

«Negizinen keshendi jumystar atqarylyp jatyr: shatyry, terezeleri, jylý berý júıesi men elektr symdary aýystyrylady. Іshki jáne syrtqy árleý jumystary júrgiziledi. Atqarylyp jatqan jumystardyń sapasy jáne kestege saı júrgizilýi monıtorıngtik toptardyń baqylaýynda.

Qysqy jylytý maýysymyna da daıyndyq júrgizilip jatyr. Barlyq bilim berý mekemeleriniń 84 % daıyndyq qujatyn aldy. Qalǵandarynda jylytý qazandyqtary, jylý berý júıesi aýystyrylyp jatqandyqtan bul jumystar kesheýildeıdi», - deıdi SQO bilim basqarmasynyń basshysy Názir Jáshibekov.

Óńir mektepteri qystan qysylmaı ótýi úshin 1 mlrd teńgege 100 myń tonnaǵa jýyq kómir alynbaq. Onyń 61 myńnan astamy túsirildi.

«Bilim berý mekemelerindegi qaýipsizdik te basty orynda. Barlyq mektep-balabaqsha, kolledjder beınebaqylaý júıesimen qamtylǵan. Bıyl bul jumysqa qosymsha 50 mln teńge jumsaldy. Jedel qyzmet kórsetý ortalyǵyna qazir 377 bilim berý mekemesi qosylsa, qyrkúıek aıynda olardyń qatary taǵy 26-ǵa kóbeıedi.

«Dabyl túımeshesin» ornatý jumystary da júrgizilip jatyr. Byltyr olardyń sany 224 bolsa, bıyl 388-ge jetpek», - deıdi Názir Jáshibekov.