SQO-da mektepter 1 naýryzdan bastap aralas sabaq berý rejımine kóshýi múmkin

PETROPAVL. QazAqparat – Soltústik Qazaqstan oblysynda Qyzyljar aýdany Sokolovka aýylynan basqa eldi mekenderde karantındik shekteýler jeńildetiledi, dep habarlaıdy QazAqparat tilshisi.

SQO bas memlekettik sanıtar dárigeri Áset Jumataev brıfıngte 28 aqpan kúshine enetin jańa qaýlyǵa qatysty túsinik berdi.

Óńirde koronavırýsqa qatysty jaǵdaıdyń turaqtanyp, «jasyl aımaqqa» ótýine baılanysty birqatar nysanǵa demalys kúnderi de jumys isteýge ruqsat berildi.

Alaıda bul jeńildiktiń Qyzyljar aýdanyndaǵy Sokolovka eldi mekenine qatysy joq. Ótken aptada bul aýylda taǵy eki adamda KVI anyqtaldy. Sol sebepti karantındik shekteýlerdi áli de saqtaýǵa sheshim qabyldandy.

Jalpy koronavırýs ınfektsııasynyń taralýyna baılanysty óńirde qazir 10 mektep qashyqtan bilim berip jatyr. Olar: Qyzyljar aýdanyndaǵy Sokolovka, Sıvkovo, Kýstovskoe orta mektepteri, M.Jumabaev aýdanyndaǵy Qaraqoǵa, Poltavskoe, Eńbekshiqaza orta mektepteri jáne Proletarskoe bastaýysh mektebi, Taıynsha aýdanyndaǵy Ilıchevka, Ýálıhanov aýdanyndaǵy Bıdaıyq jáne Ǵ.Músirepov atyndaǵy aýdannyń Salqynkól orta mektepteri.

«Jańa oqý jyly bastalǵaly 600 oqýshyda KVI anyqtaldy. Olardyń 259-y qashyqtan oqysa, qalǵandary dástúrli túrde mektepte bilim alǵan. Al muǵalimderdiń arasynda 109-y qaýipti ınfektsııany juqtyrdy. Olardyń 73-i sabaqty mektepte berse, qalǵan 36-sy onlaın sabaq ótkizgen», - deıdi Áset Jumataev.

SQO-nyń bas sanıtar dárigeriniń aıtýynsha, koronavırýs ınfektsııasyn juqtyrý jaǵdaıy azaıyp nemese qazirgi qalpynda saqtalatyn bolsa, 1 naýryzdan bastap mektepter aralas sabaq berý rejımine kóshýi múmkin. ıAǵnı negizgi pánder mektepte oqytylady. Búginde óńir mektepterinde kezekshi synyptar men mektep bitiretin túlekter ǵana dástúrli túrde bilim alyp jatyr.