SQO-da «Mektepke jol» aktsııasy aıasynda 6 myńǵa jýyq balaǵa kómek kórsetildi

PETROPAVL. QazAqparat – Soltústik Qazaqstan oblysynda Bilim basqarmasy «Mektepke jol» aktsııasy aıasynda atqarylǵan jumystardy qorytyndylap esep berdi, dep habarlaıdy QazAqparat tilshisi.

SQO Bilim basqarmasy baspasóz qyzmetiniń málimetinshe, «Mektepke jol» aktsııasy byltyrdan bastap jyl boıy ótetin bolǵan. Maqsaty – turmysy tómen, kóp balaly jáne qolaısyz otbasylardan shyqqan, jetim, ata-ana qamqorlyǵynsyz qalǵan balalarǵa materıaldyq kómek kórsetý.

«Mektepke jol» aktsııasyna únemi qatysyp, balalarǵa qoldaý kórsetetin kásipkerler bar, olar: «Mámbetov ı K», «Petropavl araq zaýyty», «AZKO», «Býdennoe SK», «Raısovskoe», «Astyq Prıvolnyı», «Zapadnoe SK», «ES GLOBAL AGRO», «Tahtabrod», «Adanı Agro», «Kompanııa «Edıl», «Azııa-Torańǵul» JShS, Vızıgın, Kantemır-Agro, Zagradovskoe, Prometeı-Agro JK.

Bıyl qashyqtan oqýǵa baılanysty balalarǵa kompıýterlik tehnıka qajet boldy. Mektepter muqtaj oqýshylardy qamtyǵanymen, demeýshiler de kómek berdi. Aqqaıyń aýdanynda Poltavka mektebiniń túlekteri 4 oqýshyǵa 630 myń teńgege noýtbýk alyp berdi. Aralaǵash orta mektebiniń túlekteri de 5 balaǵa 2 kompıýter jáne 3 noýtbýk syılady. Alaıda áli de kóp balaly otbasylarǵa kompıýterlik tehnıka qajet», - deıdi SQO bilim basqarmasynyń bas mamany Aıgúl Ospanova.

Búginge deıin «Mektepke jol» aktsııa aıasynda 5978 balaǵa kómek kórsetildi. Jalpy somasy 47 mln 656 myń teńge.