SQO-da «Mektepke jol» aktsııasy aıasynda 11 myńǵa jýyq balaǵa kómek kórsetiledi

PETROPAVL. QazAqparat – Soltústik Qazaqstan oblysynda «Mektepke jol» jalpy respýblıkalyq aktsııasy aıasynda bıyl jańa oqý jyly qarsańynda 11 myńǵa jýyq oqýshyǵa kómek kórsetilmek, dep habarlaıdy QazAqparat tilshisi.

SQO bilim basqarmasynyń málimetinshe, 2019 jyldan bastap «Mektepke jol» qaıyrymdylyq aktsııasy jyl boıy ótetin formatqa kóshirildi, biraq aktsııanyń negizgi maqsaty - balalardy jańa oqý jylyna daıyndaý.

Aktsııa aıasynda az qamtylǵan, kóp balaly jáne turmysy nashar otbasylardan shyqqan balalarǵa, jetim balalar men ata-anasynyń qamqorlyǵynsyz qalǵan balalarǵa áleýmettik qoldaý kórsetiledi. Qazirgi ýaqytta bilim basqarmasynyń tiziminde az qamtylǵan otbasylardan shyqqan 10838 bala bar. Oqýshylar mektep formasyna, sporttyq kıimge muqtaj.

Byltyr aktsııa aıasynda 6292 balaǵa kómek kórsetildi. Oqýshylarǵa kıim-keshekke, qural-jabdyqqa, sómke alýǵa jalpy somasy 83 mln 565 myń teńge jumsalǵan.

«Bıyl da bilim bólimderimen kómekke muqtaj balalardyń tizimi jasaldy. Aktsııanyń qaıyrymdylyq ekenin eskere otyryp, kómek kórsetý boıynsha demeýshilermen aqparattyq-túsindirý jumystary júrgizilip jatyr. Jalpy bilim berý qory aıasynda memlekettik ataýly áleýmettik kómek alýǵa quqyǵy bar otbasylardan shyqqan 1561 balany mektep formasymen qamtamasyz etý josparlanǵan. Bul maqsatqa 58,2 mln teńge bólindi. Sabaq bastalýǵa bir aıdyń júzi qaldy. Sondyqtan barlyq beı-jaı qaramaıtyn adamdardy osy ıgi iske qatysýǵa shaqyramyz. Sizdiń qaıyrymdylyq kómegińiz qıyn jaǵdaıǵa tap bolǵan balalarǵa oqý jylyna daıyndalýǵa kómektesedi», - deıdi Ásel Orazbaeva.