SQO-da mektepke bara jatqan oqýshyny kólik qaqty
PETROPAVL. QazAqparat – Soltústik Qazaqstan oblysynda mektepke bara jatqan 15 jastaǵy oqýshy qyzdy kólik qaǵyp ketti. Jasóspirim aýyr jaraqatpen oblystyq kópsalaly balalar aýrýhanasyna jatqyzyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa 27 jeltoqsan kúni saǵat 08:20 shamasynda Shal aqyn aýdany Ybyraev aýylyndaǵy Tsentralnaıa kóshesinde bolǵan. «Toyota Land Cruiser Prado» avtokóliginiń 62 jastaǵy júrgizýshisi abaısyzda 15 jastaǵy 10-synyp oqýshysyn qaǵyp ketti.
Osy avtokóliktiń júrgizýshisi zardap shekken jasóspirim qyzdy Shal aqyn aýdandyq aýrýhanasyna jetkizdi. Keıin bala oblystyq balalar aýrýhanasyna jatqyzyldy.
Medıtsınalyq kýálandyrý «Toyota Land Cruiser Prado» avtokóligi júrgizýshisiniń spırttik ishimdik ishpegenin kórsetti.
Polıtseılerdiń aıtýynsha, qazirgi ýaqytta jol-kólik oqıǵasy faktisi boıynsha qajetti saraptamalardy taǵaıyndaý jáne protsessýaldyq sheshim qabyldaý úshin materıal jınalyp jatyr.
Jalpy 11 aı ishinde SQO joldarynda jaıaý júrginshilerdi qaǵyp ketýge qatysty 88 jol-kólik oqıǵasy tirkeldi, saldarynan 7 adam qaza taýyp, 94 adam jaraqat aldy.
Buǵan deıin SQO Esil aýdanynda jeńil kólik júrgizýshisi jolda at jegilgen shanany soǵyp, saldarynan atty jetektegen aýyl turǵynynyń qaza tapqanyn aıtqan edik. Oqıǵa 25 jeltoqsan kúni boldy.
