SQO-da mektep oqýshylary jergilikti ósimdikterden dárýmen jasap shyǵarmaq

PETROPAVL. QazAqparat – Petropavlda mektep oqýshylary S dárýmenin ózimizde jasap shyǵarý úshin zertteý jumystaryn bastap ketti. Olar bul maqsatqa jergilikti ósimdikterdi qoldanbaq, dep habarlaıdy QazAqparat tilshisi.

Jańa jobamen Petropavldaǵy Nazarbaev Zııatkerlik mektebiniń oqýshylary aınalysyp jatyr.

Balalardyń pikirinshe, óńirde S dárýmenine baı ósimdikter jetkilikti. Endi ony ǵylymı turǵyda dáleldemek.

Sondaı-aq olardan askorbın qyshqyly bar drajeler jasaýdy kózdep otyr.

Oqýshylar hımııa, bıologııa sabaqtarynda, sondaı-aq «ECO JELI» ekologııalyq klýb úıirmelerinde SQO-da kóptep ósetin ıtmuryndyq, qaraqat, shyrǵanaq, qyzyl burysh jáne aqjelkenniń quramyndaǵy S dárýmeniniń deńgeıin baıqamaqshy.

Sondaı-aq paıdaly zattardyń mólsherin anyqtaý maqsatynda bolashaq ǵalymdar jergilikti jáne ımporttyq ónimderdiń hımııalyq quramyn salystyrady.

Al draje jasaýǵa S dárýmeniniń eń kóp mólsheri anyqtalǵan jergilikti ósimdik qoldanylady.

«Bizdiń jobamyz úsh aıǵa josparlanǵan. Ótken qysta sheteldik lımon men zimbirge suranystyń kúrt artqany esimizde. Árkim qymbat baǵaǵa qaramastan óziniń densaýlyǵy úshin bul ónimderdi aldy. Al olar uzaq saqtaýǵa kelmeıdi, tońazytqyshqa salǵanmen tez búlinedi. Biz tabıǵat ónimderin tıimsiz paıdalanýǵa qarsymyz. Tabıǵat pen taǵamdy iske jaratýda utymdylyq qajet. Sondyqtan bizdiń komanda sheteldegi jemisterge jergilikti balama oılap tappaqshy. Eń bastysy, bul vıtamın qoljetimdi jáne ekologııalyq taza bolady», - deıdi 9 «Ǵ» synybynyń oqýshysy Álıhan Gýseınov.

Ekologııalyq joba jaqsy nátıje berse, oqýshylar dárýmendi tipti ónerkásiptik aýqymda shyǵarýǵa muryndyq bolmaq.

Bul jobany mektep oqýshylary «Sý. Taǵam. Energııa» ekohakatony aıasynda qolǵa aldy.

Jaqynda bilim berý jelisinde «ECO JELI» ekoklýbtary jumysyn bastady.

Maqsat - ekologııa men tabıǵatty qorǵaý máselelerine beıjaı qaramaıtyn mektep oqýshylarynyń basyn biriktirý.