SQO-da mektep oqýshylary aeroponıka ádisimen jıdek ósirýdi qolǵa almaq

PETROPAVL. QazAqparat – Petropavlda mektep oqýshylary ósimdik sharýashylyǵyndaǵy tyń ádis – aeroponıkany qoldanyp, respýblıkalyq baıqaýda ekinshi oryndy jeńip aldy, dep habarlaıdy QazAqparat tilshisi.

8-synyp oqýshylary Artem Kýznetsov pen Janbolat Atyǵaev Petropavl qalasyndaǵy hımııa-bıologııalyq baǵytyndaǵy Nazarbaev Zııatkerlik mektebinde oqıdy.

Jasóspirimderdi bıologııa qatty qyzyqtyrady. Jaqynda olar jelekti aeroponıkalyq qondyrǵyda ósirip kórip, jaqsy nátıjege qol jetkizdi.

Balalardyń jobasy respýblıkalyq «Týǵan elge taǵzym» baıqaýynda ekinshi oryndy ıelendi.

«Baıqaýǵa bizdiń mektepter jelisinen ǵana 42 jumys usynyldy. Sonyń ishinen ekinshi oryn alyp otyrmyz, bul biz úshin jaqsy kórsetkish. Artem ekeýmiz 2 aı boıy zertteý jumysyn júrgizip, aýa jaǵdaıynda mıkrojelek ósirdik. Tájirıbe sátti ótip, aeroponıkalyq ádistiń dástúrli topyraqta ósirý ádisine qaraǵanda tıimdi ekenin anyqtadyq. Bul tek bastamasy ǵana, munymen toqtap qalmaımyz. Alda osy baǵyttaǵy zertteýlerdi jalǵastyramyz», - deıdi Janbolat Atyǵaev.

Jasóspirimderdiń aıtýynsha, bul ádiste topyraq múldem qoldanylmaıdy.

Ósimdikterdiń tamyry barlyq paıdaly jáne qorektik zattardy «tuman» túrinde shashylǵan qorektik zattary bar aerozolden alady.

«Tájirıbeniń sońynda aeropondyq ádispen ósirilgen bes túrli ósimdik topyraqta óskenderine qaraǵanda 3,7 sm-ge joǵary boldy. Bolashaqta osy ádispen ósirilgen kókenisterdiń hımııalyq quramyn zertteımiz. Sondaı-aq kókónistiń basqa túrlerin, qulpynaı men qarbyz ósirýdi josparladyq. Aeropondyq ádistiń tıimdi tustary kóp, sondyqtan bul tehnologııany ónerkásiptik maqsatta da qoldanýǵa bolady», - deıdi jas ǵalymdar.

Jazy qysqa, qysy uzaq soltústik óńirde ınnovatsııalyq tehnologııa baqsha daqyldaryn jyl boıy arnaıy úı-jaılarda ósirýge múmkindik beredi.