SQO-da mektep oqýshysy ázirlegen Telegram-bot ashana jumysyn ońtaılandyrdy
PETROPAVL. KAZINFORM – Soltústik Qazaqstan oblysynda 17 jasar Edýard ıAntsen ashanaǵa tapsyrys berý júıesin jeńildetý úshin Telegram-bot ázirlep, óz jobasyn tájirıbede sátti júzege asyrdy.
Edýard ıAntsen bıyl Mamlıýt aýdany Krasnoznamenskoe orta mektebin támamdaǵanymen, bilim ordasynda onyń esimi áli uzaq umytylmasy anyq.
Onyń «Askhana Bot - qashyqtan tapsyrys berý» dep atalǵan jobasy mekteptegi tamaqtanýǵa ótinim berý protsesin tsıfrlandyrdy. Búginde bilim berý mekemelerinde oqýshylardyń tamaqqa tapsyrysy negizinen qaǵaz arqyly qabyldanady. Saldarynan ýaqytty alady, túsinispeýshilikter týyndaýy múmkin jáne bul - ashana qyzmetkerlerine qosymsha júkteme.
- Mektepte balalardyń tamaqqa tapsyrys berip úlgermeı qalatyn kezderi jıi bolatyn. Bireýleri sabaqqa keshigedi, endi biri arnaıy qaǵazdy toltyrýdy umytyp ketedi. Ózim de birneshe ret osy sebepti mektepte tamaq ishpeı qalǵanmyn. Sondyqtan osy máseleni sheshýdiń jolyn izdeı bastadym. Sóıtip Telegram-bot jasaý ıdeıasy keldi, - deıdi Edýard.
Oqýshylar smartfondy qoldanyp, Askhana Bot arqyly qysqa ýaqyt ishinde tamaqqa tapsyrys bere alady. Mázirdi tańdap, qajet bolǵan jaǵdaıda tapsyrysty ózgertip nemese odan bas tartýǵa bolady.
Jasóspirimniń aıtýynsha, botty jasaý úshin ol aldymen máseleni jan-jaqty zerttep, túrli sheshimderdi qarastyrǵan.
- Birinshi jyly máseleni zertteýmen aınalystym. Áýelde kompıýterlik baǵdarlama jasaǵym keldi. Biraq onyń qoldanýǵa yńǵaısyz bolatynyn túsindim. Keıin oqýshylar men ashana qyzmetkerleri arasynda saýalnama júrgizdim. Sonyń nátıjesinde Telegram-bot eń tıimdi sheshim degen qorytyndyǵa keldim, - deıdi mektep túlegi.
Jobany ázirleý barysynda qıyndyqtar da az bolmaǵan.
- Basynda óte qıyn boldy. Sebebi baǵyt-baǵdar beretin adam bolmady. Barlyq qoldanýshyǵa túsinikti ári qarapaıym júıe jasaý kerek edi. Keıbir qatelikterdiń kesirinen jobany qaıtadan basynan bastaýǵa týra keldi. Biraq munyń bári jaqsy tájirıbe jınaýǵa kómektesti, - deıdi Edýard.
Búginde Askhana Bot júıesi arqyly oqýshylar burynǵy tapsyrystaryn kóre alady. Al ashana qyzmetkerleri úshin barlyq aqparat bir jerde jınaqtalady.
Zertteý barysynda Edýard oqýshylar men ashana qyzmetkerleri arasynda saýalnama júrgizip, jobany pılottyq rejımde engizgen. Nátıjesinde tamaqqa tapsyrys berý ýaqyty burynǵy 5–10 mınýttan bir mınýtqa deıin qysqarǵan. Qate rásimdelgen ótinimder sany 12%-ten 2% deıin azaısa, ashanadaǵy eseptilik daıyndaýǵa ketetin ýaqyt 45 mınýttan 5 mınýtqa deıin qysqarǵan.
Nátıjesinde júıeni paıdalanǵan mektep oqý jylynda shamamen 174 myń teńgeni únemdegen.
Edýard bul jobany ári qaraı damytýdy josparlap otyr.
- Bolashaqta jańa fýnktsııalar qosqym keledi. Ony saıt nemese mobıldi qosymsha retinde de damytýǵa bolady. Mundaı júıeni tek bizdiń mektepte ǵana emes, aýdan, oblys jáne respýblıka kólemindegi basqa oqý oryndarynda da qoldanýǵa múmkindik bar, - deıdi ol.
Bıyl 11-synypty bitirgen túlek bolashaǵyn aqparattyq tehnologııalar salasymen baılanystyrmaq.
- IT salasy maǵan óte unaıdy. Óıtkeni ol únemi damý ústinde. Adamdardyń ómirin jeńildetetin jańa jobalardy oılap taýyp, olardy júzege asyrǵym keledi, - deıdi Edýard ıAntsen.
Buǵan deıin NIS oqýshylary Parkınson derti men ınsýlt saldarynan zardap shekken jandarǵa arnalǵan qoljetimdi qurylǵy oılap tapqanyn jazǵan edik.
