SQO-da mektep oqýshysy aýadan sý jasaıtyn qondyrǵy oılap tapty
PETROPAVL. KAZINFORM – Petropavlda 9-synyp oqýshysy Álıhan Jarov taza sý máselesin sheshý jolyn usyndy. Onyń jasap shyqqan qurylǵysy sýdy aýadan alýǵa múmkindik beredi.
Soltústik Qazaqstan oblystyq bilim basqarmasynyń málimetinshe, Álıhan Jarov daryndy balalarǵa arnalǵan oblystyq mamandandyrylǵan LORD mektep-lıtseı-ınternatynda oqıdy. Taqyrypty zertteýge ustazy kómektesken.
«Ekologııalyq máselelerdi sheshý úshin qoǵamnyń aldynda resýrstardy tıimdi paıdalaný talaby tur. Qazirgi asa ózekti máselelerdiń biri - taza sýdyń tapshylyǵy. Ony sheshýge óz úlesimdi qosqym keldi. Muǵalimim baǵyt-baǵdar berip, jumys barysynda Pelte elementterin, ıaǵnı termoelektrlik túrlendirgishti qoldandyq.
Pelte elementteri energııany tıimdi paıdalaný jáne temperatýrany baqylaý múmkindigin beredi. Biz bul tehnologııany kez kelgen jaǵdaıda aýadan sýdy kondensatsııalaýǵa qabiletti qondyrǵy jasaý úshin paıdalanýdy sheshtik. Qondyrǵy energııany az mólsherde tutyna otyryp, aýadan sýdy kondensatsııalaıdy. Menińshe, bul tásildi ómirde qoldanyp, taza sý máselesin sheshýge bolady», - deıdi Álıhan Jarov.
Oqýshynyń ónertabysyn ekonomıkanyń kóptegen salasynda qoldanýǵa bolady. Máselen aýyl sharýashylyǵynda qurǵaqshylyqpen kúresýdiń tıimdi quraly bola alady, qurǵaqshylyq jerlerde daqyldardy sýarý úshin sý alýǵa múmkindik beredi. Sonymen qatar, eń bastysy, bul taza sý tapshy aımaqtarda adamdardy aýyz sýmen qamtamasyz etý úshin paıdalanylýy múmkin.
Óz jumysyn Álıhan jobalar baıqaýynyń respýblıkalyq kezeńinde qorǵap, ekinshi orynǵa qol jetkizdi. Saraptamalyq komıssııa oqýshynyń jumysyn joǵary baǵalap, qundylyǵyn moıyndady jáne ony kúndelikti ómirde qoldaný múmkindigin atap ótti.
