SQO-da mektep muǵalimderin aqsha jınaýǵa májbúrlegen
PETROPAVL. KAZINFORM – Soltústik Qazaqstan oblysyndaǵy Tımırıazev jalpy bilim beretin mektep-gımnazııasy muǵalimderi júıeli túrde aqsha jınaý týraly málimdedi.
Áleýmettik jelide muǵalimniń jazbasy tarady. Ustazdar máseleni ashyq aıtýǵa jumystan shyǵaryp jibere me dep qorqady.
- Kóp jyldan beri bizden Qarttar kúnine birkúndik eńbekaqymyzdy jınap alady. Sondaı-aq, 9 mamyr kúni ardagerlerge dep jınaıdy. Sońǵy 3-4 jyldan beri birkúndik emes, 50% alatyn boldy. Aýdanda ardagerler qalmady, sonda da jınaıdy.
Bıyl bizge 100 myń teńge jınaý qajet dedi. Mektebimizge 17 zeınetker bekitilgen. Kásipodaq tóraǵasyna buıryq beredi, osyndaı soma kerek dep. Dırektorymyz «eshqandaı buıryq bergen joqpyn, tizimdi ákimdikten ákeldi» dep aıtty, - deıdi atyn atamaýdy suraǵan muǵalim.
SQO Bilim basqarmasynyń baspasóz hatshysy Ásel Orazbaevanyń aıtýynsha, vedomstvoǵa májbúrli aqsha jınaýǵa qatysty bir de bir shaǵym túspegen.
- Qazirgi ýaqytta tıisti aqparatty tekserý jáne málimetterdi naqtylaý jumystary júrgizilip jatyr.
Sonymen qatar, Bilim basqarmasy bilim berý uıymdaryna Qarttar kúnine arnalǵan is-sharalardy muǵalimderden, bilim alýshylardan jáne ata-analardan mindetti túrde aqsha jınamaı jáne dastarqan jaımaı, shyǵarmashylyq kontsertter men merekelik baǵdarlamalar formatynda ótkizýdi usynady.
Bilim berý uıymdarynda aqshany májbúrlep jınaýǵa tyıym salynǵanyn eskertemiz. Mundaı is-sharalarǵa qatysý tek erikti túrde ǵana júzege asyrylady.
Eger de aqsha jınalǵandyǵy jóninde shaǵym túsip, fakt bolsa, bilim basqarmasy tekserý júrgizip, quqyqtyq baǵa beriledi, - dedi Ásel Orazbaeva.
Buǵan deıin pedagog mártebesi qalaı qorǵalyp jatqandyǵy týraly jazǵan edik.
