SQO-da mektep avtobýstarynyń tehnıkalyq jaǵdaıy tekserilip jatyr
SQO polıtsııa departamenti baspasóz qyzmetiniń málimetinshe, Mamlıýtka qalasynda polıtseıler aýdandyq bilim bólimimen birge balalardy mektepke tasymaldaıtyn kólik quraldaryn tekserdi. Aýdanda aýyldyq okrýgter men aýdan ortalyǵyndaǵy mektepter men ınternattarǵa balalardy aparatyn 10 «GAZel» jáne 2 «PAZ» avtobýsy bar. Tártip saqshylary avtobýstardyń tehnıkalyq jaǵdaıyn, naqtyraq aıtqanda, sary jarqyldaýyq maıaktyń bar bolýyn, taný belgilerin, artqy esikterdiń qoljetimdi bolýyn, dári qobdıshasyn, órt sóndirgishti, sondaı-aq kólik dóńgelekteriniń rezeńkesin tekserdi.
Tekserý nátıjesi boıynsha aýyldyq okrýgterdiń biriniń «GAZel» kóliginiń júrgizýshisine kemshilikterdi joıý jónindegi akt jazyldy jáne dóńgelekteriniń rezeńkeleri tıisti jaǵdaıda bolmaǵandyqtan kólikti paıdalanýǵa tyıym salyndy. Kemshilik kelesi kúni joıyldy. Dóńgelekter almastyryldy.
Balalardyń qaýipsizdigin qamtamasyz etý SQO PD Jergilikti polıtsııa qyzmeti basqarmasynyń udaıy baqylaýynda. Oblystyq patrýldik polıtsııa batalonynyń qyzmetkerleri mektep avtobýstary UBT-ǵa, jarystarǵa, ekskýrsııalarǵa barǵan ýaqytta únemi ilesip júredi. Bul asa jaýapty jumys. Mysalǵa, 2019 jyldyń mamyr aıynda Roşınskoe edji mekeniniń mańynda respýblıkalyq avtojolda Petropavldan 11 balany Taıynshaǵa apara jatqan «GAZel» avtokólginiń kapoty astynan tútin shyqqan. «Lada Vesta» qyzmettik avtokóligimen balalarǵa ilesip júrgen patrýldik polıtseıler Jiger Baltabaı men Batyrhan Moldajanov shuǵyl áreket etip, jazataıym oqıǵanyń aldyn aldy. Qańtar aıynyń basynan oblys polıtseıleri balalar mingen avtobýstardy 7 ret barar jerine jetkizgen.
Jalpy byltyr SQO-da balalardyń qatysýymen 53 jol-kólik oqıǵasy tirkelgen, saldarynan 4 bala qaıtys bolǵan jáne 61-i jaraqat alǵan.
