SQO-da mektep avtobýstary tekserilip jatyr
PETROPAVL. QazAqparat – Soltústik Qazaqstan oblysynda bilim basqarmasynyń bastamasymen «Qaýipsiz mektep avtobýsy» aktsııasy uıymdastyrylyp, tártip saqshylary kólikterdiń sapasyn tekserdi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, «Qaýipsiz mektep avtobýsy» aktsııasy óńirde 15 qańtar men 15 aqpan aralyǵynda ótip jatyr. Іs-shara aıasynda tártip saqshylary Qyzyljar aýdany Beskól aýylyndaǵy «Parasat» mektep-lıtseıinde boldy. Bilim basqarmasynyń ókilderi «Jolda baıqap júr» atty tárbıe saǵatyn ótkizse, polıtseıler oqý orny avtobýsynyń tehnıkalyq jaǵdaıyn, qujattaryn tekserdi. Salonda dári-dármek qobdıshasy men órt sóndirgishtiń bolýy mindet.
«Mektep avtobýstaryna qoıylatyn birqatar talap bar. Mindetti túrde «Balalardy tasymaldaý» degen tórt burysh belgisi, sary tústi jaryq belgileri bolýy qajet. Jyltyldaǵan jaryq belgisi basqa jol qozǵalysy qatysýshylarynyń aldynda basymdyq bermese de, júrgizýshilerge keı talaptardy oryndamaýǵa múmkindik beredi. Máselen, «toqtaýǵa ruqsat joq» jol belgisiniń janyna aıaldaýǵa bolady, ári bul belgi basqalardyń nazaryn aýdarady», - deıdi SQO PD jergilikti polıtsııa qyzmeti basqarmasynyń aǵa ınspektory Azamat Jamuqov.
«Parasat» mektep-lıtseıinde 500-den asa oqýshy bolsa, olardyń shamamen 120-sy kúndelikti tasymaldanady. Avtobýs úsh mezgil qatynaıdy.
Mektep avtobýstarynyń júrgizýshilerimen únemi aldyn alý áńgimeleri ótkiziledi. Oqý oryndarynyń basshylyǵy eldi mekenderden tys jerlerde balalardy tasymaldaý patrýldik polıtsııa ekıpajynyń alyp júrýimen júzege asatyny eskertiledi. «Qaýipsiz mektep avtobýsy» aktsııasy oblystyń barlyq aýdandarynda ótkiziledi.
Jalpy oblys boıynsha, 1400-den asa bala ınternatta oqıdy. Budan basqa 1200-ge jýyq oqýshy kúndelikti mektepke qatynaıdy. Olardy tasymaldaýǵa 125 kólik bólingen. Bıyl «GAZel» markali 33 shaǵyn avtobýsty satyp alýǵa oblystyq qazynadan qarajat bólindi.
