SQO-da mektep avtobýstary jol qaýipsizdigi talaptaryna saı kelmegen
ASTANA. KAZINFORM — Soltústik Qazaqstan oblysynyń prokýrorlary mektep avtobýstaryn paıdalaný barysynda buzýshylyqtardy anyqtady, dep habarlaıdy vedomstvonyń baspasóz qyzmeti.
Prokýratýra organdary kámeletke tolmaǵandardyń quqyqtary men zańdy múddelerine qaıshy keletin buzýshylyqtardy anyqtaýǵa jáne olardyń jolyn kesýge baǵyttalǵan júıeli jumys júrgizip keledi.
Taldaý aıasynda Jolaýshylar men bagajdy avtomobılmen tasymaldaý erejelerin, sondaı-aq mektep avtobýstaryn paıdalaný kezinde jol qozǵalysy erejelerin óreskel buzý faktileri anyqtaldy.
Osylaısha, M.Jumabaev, Ǵ.Músirepov aýdandarynyń oqý oryndarynda mektep avtobýstaryn «Balalardy tasymaldaý» sary jypylyqtaıtyn shamdarmen jáne mindetti sáıkestendirý belgilerimen jabdyqtaý boıynsha tıisti sharalar qabyldanbaǵan.
Ǵ.Músirepov aýdany Shóptikól aýylyndaǵy mektep avtobýsynda qaýipsizdik beldikteri aqaýly jaǵdaıda bolǵan, bul jol qaýipsizdiginiń mindetti talaptaryna saı kelmeıdi. Sol aýdanda Birlik, Salqynkól, Tahtabrod jáne Kalınovka mektepteriniń avtobýstarynda dabyl túımeleri jumys istemeı turǵan. Bul rette Shal aqyn jáne Ǵ.Músirepov aýdandaryndaǵy mektep avtobýstarynda paıdalaný merzimi ótip ketken órt sóndirgishter paıdalanylǵan, bilim berý uıymdarynyń júrgizýshileri ereje talaptaryn buza otyryp, borttyq jýrnaldar júrgizbegen.
Petropavl qalasynda oqý oryndarynyń jekelegen júrgizýshileri jolǵa shyǵar aldynda mindetti medıtsınalyq tekserýden ótpeı, oqýshylardyń ómiri men densaýlyǵyna qaýip tóndirgen.
— Prokýrorlyq qadaǵalaý aktileri boıynsha kináli tulǵalar, onyń ishinde mektep dırektorlary zańda belgilengen jaýapkershilikke tartylyp, anyqtalǵan buzýshylyqtar joıylyp, kólikter belgilengen talaptarǵa sáıkestendirildi. Qabyldanǵan sharalar 457 kámeletke tolmaǵannyń quqyqtaryn qorǵaýdy qamtamasyz etti, — delingen Soltústik Qazaqstan oblysy prokýratýrasynyń habarlamasynda.
Buǵan deıin áleýmettik jelilerde Almaty qalasynyń mektepterine terrorıstik shabýyl daıyndalyp jatqany týraly aqparat taraǵanyn jazǵan edik.