SQO-da medıtsınalyq qyzmetke túsken shaǵymdardyń 80 paıyzy emhana jumysyna qatysty

PETROPAVL. KAZINFORM – Soltústik Qazaqstan oblysynda jyl basynan bergi 10 aıda call-ortalyqtyń 1414 nómirine 339 adam aryzdanyp habarlasqan. Kópshilik sapasyz kórsetilgen qyzmetke shaǵymdanǵan.

«Áleýmettik medıtsınalyq saqtandyrý qory» KEAQ SQO boıynsha fılıaly baspasóz qyzmetiniń málimetinshe, shaǵymdardyń 131 - sapasyz medıtsınalyq qyzmet kórsetýge, 86 - medıtsınalyq kómek kórsetýden jáne 37 - dárilik zattarmen qamtamasyz etýden bas tartýǵa, 22 - medıtsınalyq qyzmetterdi uzaq kútýge qatysty. Sondaı-aq turǵyndar MÁMS máselesi, emhanaǵa tirkelý jáne medıtsınalyq etıka men deontologııany buzý boıynsha habarlasqan.

Taldaý kórsetkendeı, shaǵymdar negizinen alǵashqy medıtsınalyq-sanıtarlyq kómek kórsetetin emhanalardyń jumysyna baılanysty. Bul barlyq túsken shaǵym men ótinishterdiń shamamen 80%-yn quraıdy.

«Oblys turǵyndary fılıalǵa keńes alý úshin de habarlasady, osy jyldyń 10 aıynda 3 296 adam osy maqsatta habarlasty, onyń ishinde 600-ge jýyq adam bizdiń fılıaldyń azamattardy qabyldaý kabınetine jeke ózi júgindi. Óńirde shamamen 524 myń adam turady, onyń ishinde 460 myńǵa jýyq turǵyn áleýmettik medıtsınalyq saqtandyrý qorynda «saqtandyrylǵan» mártebesine ıe. Bul 83%-ǵa teń», - deıdi «Áleýmettik medıtsınalyq saqtandyrý qory» KEAQ SQO boıynsha fılıaly dırektory Aınagúl Dáýletshına. 

Buǵan deıin SQO-da bıyl turǵyndardyń basym bóligi júıke jáne qan aınalym júıesiniń aýrýlarynan qaıtys bolǵanyn jazǵan edik.